(Казан, 20 декабрь, «Татар-информ»). 17 декабрьдә Екатеринбургта режиссер Илдар Ягъфәровның «Исәнмесез» фильмын күрсәттеләр. Татарстан Республикасының Свердловск өлкәсендәге Даими вәкиллеге матбугат хезмәте хәбәр иткәнчә, картинаның премьерасы 8 сентябрьдә Казан халыкара мөселман киносы фестивалендә булды, анда фильмга тамашачылар мәхәббәте призы һәм Татарстан Президенты исеменнән «Кино сәнгатендәге гуманизм өчен» дигән бүләк тапшырылды. Фильмны төшерүдә Татарстан һәм Башкортстанның 35 атказанган һәм халык артисты катнашкан. 18 ноябрьдә картина Татарстан шәһәрләре һәм Башкортстан башкаласы тамашачылары игътибарына тәкъдим ителде. Кино йортының зур залына тамашачыларны чакыру билетлары буенча керттеләр. «Исәнмесез» фильмының премьерасы зур уңыш белән узды.
