Павел Грудинин Орусиянын президенттигине талапкерлигин көрсөттү

Орусиядагы “Ленин атындагы совхоз” агрохолдингинин башчысы Павел Грудинин өлкө президенттигине талапкерлигин көрсөтүп, Борбордук шайлоо комиссиясына документин тапшырды. Ал  Орусия  Федерациясынын Компартиясынын өкүлү катары (РФКП) талапкерлигин койду. Анын шайлоо штабын коммунисттердин азыркы лидери Геннадий Зюганов өзү жетектейт.


Грудинин өзү РФКП партиясына мүчө эмес, бирок, мурунтан партиянын идеяларын колдоорун ачык айтып келген. 2010-жылга чейин ал “Бирдиктүү Орусия” партиясына мүчө болуп жүргөн. Президенттик программасында ал жакырчылык менен күрөшөөрүн көрсөткөн.


28-декабрда Боршайком Владимир Путинди президенттикке талапкер катары каттады. Ошол эле маалда Боршайком оппозициячы саясатчы Алексей Навальныйдын мурунтан шарттуу соттолгонун жүйө кылып, аны жарыштан четтетип койду. Навальный өз маалында орусиялыктарды келээрки президенттик шайлоону бойкоттоого чакырды.


Орусияда президенттик шайлоо 2018-жылы 18-мартта өтөт. Буга чейин сыналгы алып баруучу Ксения Собчак, ишкер Борис Титов, ЛДПР партиясынын лидери Владимир Жириновский жана "Яблоко" партиясынын негиздөөчүсү Григорий Явлинскийдин талапкерлиги БШКда каттоодон өткөн.