Соьлжа-ГIалина юккъехь герзаш диттина Кадыровн "юххерчу доттагIчо" - Baza

Федералан лехамашкахь хилла ХIинжа-ГIаларчу «Анжи» футболан клубан хилла вице-президент Идрисов Махи юкъахь а волуш, герзаш деттар нисделла Соьлжа-ГIалина юккъехь. Цунах лаьцна хаамбина Baza телеграм-канало, информаци стенгара ю а ца дуьйцуш. И хаамаш тIечIагIбина бац Нохчийчуьрчу чоьхьарчу гIуллакхийн министраллин урхалло.


"Базин" хаамца, марсхьокху-беттан 20-чу буса Идрисов цхьанакхетта хилла Соьлжа-ГIалин юккъехь шена тоххара дуьйна вевзаш хиллачу спортхочуьнца Хабибов Надирца. «Анжин» хиллачу вице-президенто къамелдан юьстах а ваьккхина, тапча а яьккхина, Хабибовн когах тоьхна, мацахлерачу девнна тIехула ша къинтIера ваккхар доьхуш.


Лазийначун дешнашца, «База» канало яздо, тапча тоьхначул тIаьхьа Идрисов "ведира" аьлла. Хабибов дарбан цIийнехь ву, йинчу чевнан барам хууш бац. Марсхьокху-беттан 20-чу буса Соьлжа-ГIалахь герзаш деттарх Нохчийчуьрчу МВД урхаллин сайтехь бина хаам бац.



2019-чу шеран гезгамашин-баттахь лецира Дагестанехь Идрисов Махи – иза бехкевира мехкадаьтта духкучу хенахь лелийначу курхаллина тIехула. Цул совнах дуккха а герз а, тIеман гIирсаш а карийнера вице-президентан цIийнах хьоьвсинчу хенахь. Лаьцначул тIаьхьа Идрисов цIера дIасавалар дихкина, чохь витинера, амма 2020-чу шеран Чиллан-баттахь иза веддера Дагестанера Нохчийчу, федералан лехамашка а веллера иза, хIетахь дуьйна зорбанан гIирсашкахь хьахош вацара.
Иза Нохчийчу вадале хьалха, Кавказ.Реалиино яздинера, Идрисовгахьа гIо дахарх МВД-н министран гIовс хиллачу Алаудинов Аптис. «Анжин» вице-президент хиллачун инстаграмехь Кадыров Рамзанца а, кхинболчу нохчийн хьаькамашца а цхьаьна даьхна суьрташ дара, яздора «Кавказский узел» гIирсо. "Коммерсанто" Идрисов Махи Нохчийчоьнан куьйгалхочун ""уллора доттагI" ву олура.
"Анжи" футболан клубо 2022 –чу шарахь сацийра ловзарш, хIунда аьлча, рогIерчу сезонехь ловза лицензи яккха аьтто ца баьллачу цуьнгара профессионалан статус дIаяьккхира.