Մխիթարյանը գիտի հաջողության բանաձևը, նա ինձ առաջինն է շնորհավորել. Սարգիս Ադամյան
Հայաստանի ֆուտբոլի ազգային հավաքականի հարձակվող Սարգիս Ադամյանն անչափ ուրախ է «Հոֆենհայմ» տեղափոխվելու կապակցությամբ, ձգտելու է ավելի մեծ հաջողությունների հասնել նոր ակումբում և արդեն շնորհավորանք է ստացել Հենրիխ Մխիթարյանից: Հայ ֆուտբոլիստն առաջին բացառիկ հարցազրույցն է տվել ՀՖՖ պաշտոնական կայքին` «Հոֆենհայմ» տեղափոխվելուց հետո:
«Հոֆենհայմ»-ի ներկայացուցիչները վաղուց էին հետևում իմ խաղին և արդեն 2 ամիս առաջ կապվել էին ինձ հետ: Բնականաբար, քանի դեռ մրցաշրջանի ավարտին ժամանակ կար, տեղափոխությունն անհնար էր: Այդ պատճառով միայն հիմա հնարավոր եղավ հայտարարել տրանսֆերի մասին:
Շատ հպարտ եմ, հատկապես, երբ հիշում եմ անցած ճանապարհս: Դեռ երկու տարի առաջ խաղում էի գերմանական 4-րդ Բունդեսլիգայում, բայց երկու շատ լավ տարի անցկացրի «Յան Ռեգենսբուրգում» և հիմա այստեղ եմ: Պետք է ամեն ինչ անեմ՝ իմ նոր ակումբում նորանոր հաջողությունների հասնելու և իմ խաղով հայ երկրպագուներին ուրախացնելու համար»,- ասել է Ադամյանն ու հավելել, որ առաջընթացը տքնաջան աշխատանքի արդյունք էր:
Հայ ֆուտբոլիստը նշել է, որ երբեք չի հանձնվել, անդադար մարզվել է և հավատացել, որ մի օր կհասնի այս մակարդակին: Ադամյանի խոսքերով` «Հոֆենհայմ»-ն արդեն մեծ հաջողություւններ է գրանցել ինչպես Գերմանիայում, այնպես էլ Եվրոպայում՝ մասնակցելով նույնիսկ Չեմպիոնների լիգային:
«Թիմը միշտ հարձակողական ոճի ֆուտբոլ է խաղում, ինչը շատ հոգեհարազատ է ինձ, քանի որ «Յան Ռեգենսբուրգը» ևս այդպիսի ֆուտբոլ էր դավանում: Ինչ վերաբերում է լիգաների միջև տարբերություններին, պետք է ասել, որ Երկրորդ Բունդեսլիգայում էլ հեշտ չէ խաղալը, բայց, բնականաբար, Բունդեսլիգայում ավելի բարձրակարգ ֆուտբոլիստներ են խաղում, իսկ թիմերը տակտիկապես ավելի գրագետ են:
Հենրիխն առաջիններից մեկն էր, որ շնորհավորեց ինձ: Նշեց, որ շատ կարևոր քայլ եմ կատարել և արդեն իսկ մեծ հաջողության եմ հասել, բայց խորհուրդ տվեց չթուլացնել տեմպը և շարունակել աշխատել նույն ոգով: Հենրիխն այն ֆուտբոլիստն է, ում խորհուրդները միշտ էլ կարելի է հաշվի առնել. նա գիտի հաջողության բանաձևը»,- ասել է Ադամյանը: