БҰҰ Қауіпсіздік кеңесі Трамптың Газа секторы жайлы бейбіт жоспарын мақұлдады. Ресей мен Қытай қалыс қалды
БҰҰ Қауіпсіздік кеңесі Газа секторына қатысты АҚШ ұсынған бейбіт жоспар жөніндегі қарарды мақұлдады. АҚШ президенті Дональд Трамптың 20 тармақтан тұратын бейбіт жоспарының екінші кезеңінде Газаны демилитаризациялау үшін Халықаралық тұрақтандыру күштерін құру және аумақты басқарудың өтпелі құрылымдарын қалыптастыру қарастырылған.
Қауіпсіздік кеңесіне мүше 15 мемлекеттен 13-і қарарды қолдап дауыс берді. Өздерінің вето құқығын пайдаланбаған Ресей мен Қытай дауыс беру кезінде қалыс қалды.
Қарарда Палестина мемлекетінің құрылу перспективасы жайлы да айтылған. Араб елдерінің талабымен құжатқа енгізілген бұл тармаққа Израиль қарсы болды.
АҚШ өкілдері Халықаралық тұрақтандыру күштеріне бірнеше елдің әскери бөлімдері кіретінін айтты, бірақ нақты қандай мемлекеттер екенін әзірге нақтылаған жоқ.
Қарар қабылданғаннан кейін көп ұзамай палестиналық ХАМАС радикалды тобы (АҚШ пен Еуроодақта террорлық топ деп танылған) бұл құжатқа қарсы екенін мәлімдеді. ХАМАС жаңа қарар палестиналықтардың құқықтары мен талаптарын ескермейді деген уәж айтып, Трамптың жоспары "Газа секторына халықаралық қамқорлық тетігін күштеп таңуды көздейді, ал халқымыз бен оның қозғалыстары ондайды қабылдамайды" деп мәлімдеді.
ХАМАС сондай-ақ халықаралық күштерге Газада өзге міндеттермен қоса қарсылықты қарусыздандыру міндетін жүктеу оларды бейтарап болудан айырып, қақтығыстың бір тарабына айналдырады және "оккупацияны қолдауға мәжбүр етеді" деп есептейді.
Қарардың кейінгі нұсқасы бойынша, Халықаралық тұрақтандыру күштерінің негізгі міндеттерінің бірі – "мемлекеттік емес қарулы топтардың (олардың қатарына ХАМАС та жатады) қару-жарағын қолданыстан алу", оған қоса бейбіт халықты қорғау және гуманитарлық көмек жеткізу жолдарының қауіпсіздігін қамтамасыз ету болмақ.
Газа секторы Израиль мен Египетпен шектесетіндіктен, халықаралық тұрақтандыру күштері бұл екі елмен өзара әрекет жасайтын болады. Бұған қоса, қарарда Газа секторында жаңа палестиналық полиция құру қарастырылған. Бұған дейін Газа полициясы ХАМАС-қа бағынышты болып келген.
Көптеген мемлекеттерде террористік ұйым деп танылған ХАМАС тобына мұндай талап қаруды тапсыруға барабар. Мұндай талап Трамп жоспарының бастапқы нұсқасында да болған.
Жоспардың бірінші кезеңі 10 қазанда басталған. Сол күні Израиль мен ХАМАС арасындағы атысты тоқтату туралы келісім күшіне енді және ХАМАС тұтқында ұстап келген, тірі қалған израильдіктер палестиналық саяси тұтқындарға алмастырылды.