Студот во Авганистан уби над 70 луѓе

Талибанските власти во Авганистан соопштија дека најмалку 78 луѓе меѓу кои и и неколку деца  загинале во студениот бран што ја зафати Азија, во кој температурите паднаа на најниско ниво во повеќе од една деценија.


Министерството за управување со катастрофи на Талибанците на 19 јануари соопшти дека смртните случаи поради студот се регистрирани во осум провинции од 34 во последните осум дена, додека околу 77.000 добиток исто така угинале, што претставува закана за и онака кревката безбедност на храната во земјата.


Најстудената зима во последните 15 години, во која температурите паднаа и до -34 Целзиусови степени, го погоди Авганистан среде тешка економска криза.


Многу хуманитарни групи делумно ги прекинаа операциите во последниве недели поради пресудата на Талибанците дека повеќето работнички на невладини организации не смеат  да работат, оставајќи ги агенциите неспособни да управуваат со многу програми во конзервативната земја.


„Времето ќе стане постудено во следните неколку дена, затоа е неопходно да се размислува за хуманитарна помош за настраданите лица“, изјави Абдула Ахмади, раководител на Оперативниот центар за вонредни состојби при Министерството за управување со катастрофи.




Канцеларијата на ОН за координација на хуманитарни прашања минатата недела соопшти дека ограничувањата за работничките ги попречуваат напорите за испорака на помош.


Дури и во почетокот на зимата, здравствените работници пријавија нагло зголемување на бројот на мали деца кои страдаат од сериозни случаи на пневмонија и други респираторни заболувања, делумно поради влошувањето на сиромаштијата што ги остави луѓето да не можат соодветно да ги загреат своите домови.