Әлмәттә 150дән артык гаилә илкүләм проект ярдәмендә фатир алды
(Казан, 18 август, «Татар-информ»). Бүген Әлмәттә 154 гаиләгә яңа фатир ачкычлары тапшырылды. Аларның барысы да «Татнефть» компаниясендә эшли һәм социаль ипотека программасында катнашучылар. Тантаналы чарада Татарстан Хөкүмәте башлыгы Алексей Песошин да катнашты.
426 фатирлы 14 катлы йортны төзү эшләре «Торак һәм шәһәр мохите» илкүләм проектын (инициаторы — Россия Президенты Владимир Путин) гамәлгә ашыру кысаларында ТР Президенты каршындагы Дәүләт торак фонды инвестицияләре хисабына алып барылган.
Татарстан Президенты Рөстәм Миңнеханов татарстанлыларның торак шартларын яхшырту кирәклеге турында бер генә тапкыр искәртмәде. «Безнең гражданнарны борчый торган актуаль темаларның берсе – кешеләрне торак белән тәэмин итү һәм аның үтемле булуы», - дип билгеләп үтте республика Президенты 2019 елда Дәүләт Советына Юлламасында.