Алтайның «Дулкын» татар мәдәнияте үзәге интеллектуаль уеннар турнирын башлады
(Казан, 23 ноябрь, «Татар-информ»). Алтай өлкәсенең «Дулкын» татар мәдәнияте үзәге иҗтимагый оешмасы интеллектуаль уеннарның яңа турнирын башлап җибәрде. Барлыгы дүрт уен планлаштырылган. Бу хакта Бөтендөнья татар конгрессы матбугат хезмәте хәбәр итә.
Уеннар сериясе «Алтайда татар мәдәнияте көннәре» проекты кысаларында планлаштырылган. Беренче уен оешма активистлары арасында яңа офиста узды. Уен ТАССРның 100 еллыгына багышланып, Татарстан тарихы һәм бөек эшлеклеләре темасын яктыртты. Командалар югары белем дәрәҗәсен күрсәтте һәм икенче тапкыр ярышырга теләк белдерде.
Чара Алтай краеның «Алтай краенда дәүләт милли сәясәтен гамәлгә ашыру» дәүләт программасы кысаларында өлкә субсидиясе акчасына үткәрелә, диелә бу хәбәрдә.