ФИФАнын мурунку баш катчысы Жером Вальке коррупцияга айыпталды

Швейцариянын башкы прокурору дүйнөнүн эң башкы футбол уюму - ФИФАнын мурунку баш катчысы Жером Валькени жана француз ПСЖ футбол клубунун президенти Нассера Ал-Хелаифини коррупцияга айыптады. Бул тууралуу Reuters маалымат агенттиги кабарлады. Сөз Италия жана Грецияда өткөн дүйнө чемпионатын көрсөтүү укугун телекомпанияларга берүүдөгү коррупция тууралуу болуп жатат.


Вальке пара алууга, өз бийлигинен пайдаланып жасалма документ даярдаган деп айыпталса, Ал-Хелаифи Валькени азгырып, мыйзамсыз аракеттерге түрткөн деп шектелүүдө.


Жыл башында иликтөөчү журналисттердин бирикмеси жана Mediapart басылмасы Вальке менен Ал-Хелаифиге таандык делген каттарды жарыялашкан. Ал каттарга таянган журналисттер ПСЖнын президенти Валькеге пара берген деген тыянакка келишкен. Тагыраагы ФИФАнын баш катчысы медиа укуктарды бөлүштүрүү мүмкүнчүлүгүнөн пайдаланып, Сардиниядан кыймылсыз мүлк алган деп шек саналууда.


Reuters маалымат агенттиги ал каттар 2022-жылы дүйнө чемпиондугу кайсыл жерде өтөөрүн тандоодо футбол ассоциациясынын жетекчилигинин арасындагы коррупцияны далилдеши мүмкүн деп жазат.


2012-жылы өткөн чүчүкулактан дүйнө чемпиондугун өткөрүү укугун Катар утуп алган.


Бул доо боюнча футбол дүйнөсүнүн жогорку кызматтагы 14 аткаминери айыпталууда. Журналисттер дүйнө чемпиондугун өткөрүү укугун Орусия менен Катар утуп алганы да кокустук эмес деп эсептешет. Алардын пикиринде, эки өлкө тең дүйнөлүк мелдешти өткөрүү укугун акчанын күчү менен алган. Мисалы Катарда таптакыр футбол инфраструктурасы жок болчу. Салттуу түрдө жайында башталчу дүйнө чемпиондугу эми ысыктын айынын ноябрь-декабрда өткөнү турат.


Вальке ФИФАнын баш катчылыгына 2007-жылы келген. Ал Бразилияда 2014-жылы өткөн дүйнө чемпионатына билеттерди сатууда коррупцияга шектелип, 2016-жылы иштен айдалган.