«Абитуриентларга 6 тача йўналишга ҳужжат топшириш имкониятини бериш режалаштириляпти»
Айни дамда Ўзбекистон Ёшлар иттифоқининг “Ёшлар пресс-клуби”да таълим тизимига бағишланган сессия бўлиб ўтмоқда.
Унда Олий ва ўрта махсус таълим вазири Иномжон Мажидов, Халқ таълими вазири Шерзод Шерматов, Мактабгача таълим вазири Агрепина Шин, Таълим сифатини назорат қилиш инспекцияси бошлиғи Улуғбек Ташкенбаев, Президент, ижод ва ихтисослаштирилган мактабларни ривожлантириш агентлиги директори Сарвар Бабаходжаев ва Давлат тест маркази директори Мажид Каримовлар иштирок этмоқда.
Ҳуқуқшунос Хушнудбек Худойбердиевнинг ёзишича, сессияда ДТМ директори Мажит Каримов абитуриентларга бу йилдан бериладиган имкониятлар ҳақида қуйидаги маълумотларни айтиб ўтган:
“2020 йилда абитуриентлар уйидан туриб, ДТМ сайти орқали онлайн ариза топширишларини йўлга қўймоқчимиз.
Шунингдек, 2019 йилда абитуриентларга илк марта бирданига учта йўналишга ҳужжат топшириш ҳуқуқи берилган бўлса, 2020 йилда 5 ёки 6 та йўналишга ҳужжат топшириш имкониятини беришни режалаштиряпмиз”.