ТУЗ ИЧИБ ТУЗЛИҚҚА ТУПУРГАН ТАНБАЛ…
Навоий шаҳар ИИБга 1956 йил таваллуд топган, нафақахўр, Навоий шаҳри, «Ибн Сино» кўчасида яшовчи С. В. ариза орқали мурожаат этиб, номаълум шахс унинг яшаш хонадонидан пластик карточкасини ўғирлаб кетганлигини маълум қилган. Олиб борилган тергов-суриштирув ишлари натижасида аниқландики, С. В. нинг таниши — 1963 йил туғилган, миллати ўзбек, оилали, Навоий шаҳри, «Толстой» кўчасида истиқомат қилувчи К. Б. унинг дала ҳовлисига меҳмондорчиликка бориб, меҳмонхонада қаровсиз қолдирилган банк пластик карточкасини яширин равишда ўғирлаб кетган.
Пластик карточканинг ҳимоя пароли К. Б. га олдиндан аён бўлгани сабаб, банкомат орқали ундаги жами 6 миллион 380 минг сўм пул маблағини нақд пул ҳисобида амалга ошириб, ўз эҳтиёжлари йўлида сарфлаб юборган. Мазкур ҳолат юзасидан К. Б. га нисбатан Жиноят кодексининг 169-моддаси 1-қисми билан жиноят иши қўзғатилган.
Халқимизда: «Очиққан — ўғри бўлур», — мақоли бежизга қўлланилмайди. Очкўзлик, ўз нафсига ҳирс қўйиш каби иллатлар йиллар давомида мисқоллаб йиғилган обрўни кўкка совуриши айни ҳақиқат. К. Б. сингари отахонларнинг ўғирликка қўл уриши ачинарли ҳол. Зеро, кекса авлод вакиллари ҳар бир ҳатти-ҳаракати, юриш-туриши бугуннинг ёшларига шахсий намуна ҳамда ибрат мактабидир. Қариликда содир этилган жиноий қилмишга эндиликда қонуний баҳо берилади.
Навоий вилояти ИИБ Ахборот хизмати