Испания ва Португалияни жазирама иссиқ қамраб олиши мумкин
Синоптиклар Пиреней ярим ороли жанубида ҳаво ҳарорати Цельсий бўйича 44 даражадан ошишини тахмин қиляпти, дея хабар беради euronews.
Испаниянинг Андалусиядаги Севилья ва Кордова шаҳарларида синоптиклар яқин кунларда ҳаво ҳарорати Цельсий бўйича 44 даражагача кўтарилиши мумкинлигидан огоҳлантиряпти. Маҳаллий аҳолининг айтишича, бундай шароитда оддий ҳаёт кечириш деярли имконсиз бўлиб қолган.
«Жуда иссиқ, ҳаво дим. Биз бошдан кечираётган бундай жазирамада яшаш қийин», – дейди Севильи Пако.
«Уч йил аввал мен тўрт марта иссиқ уришни бошдан кечирдим. Ишда ҳушимдан кетиб қолдим. Энди эса жуда эҳтиёткорман, бундан қўрқаман», – дейди қурувчи Мигель Анхель.
Сўнгги йилларда жазирама Европада тез-тез кузатилиб, узоқроқ давом этяпти.
2022 йил Испанияда қайд этилган энг иссиқ йил бўлди ва метеорологлар бу йил аввалги рекордни янгилаши мумкинлигини тахмин қиляпти.
Ёз эндигина бошланди, бироқ жорий йилнинг баҳоридаёқ мамлакатнинг айрим ҳудудларида ҳаво ҳарорати Цельсий бўйича 35 даражадан ошди.