«Алтын мөнбәр»дә ике яңа номинация – Ильяс Гафаров үз эшчәнлеген башлаган булса кирәк
2026 елда «Алтын мөнбәр» Казан халыкара кинофестивале программасын яңа номинацияләр белән киңәйткән – төп конкурска «Иң яхшы тавыш режиссурасы» һәм «Фильмның иң яхшы музыкаль бизәлеше» номинацияләре өстәлгән.
Фестивальнең башкарма директоры Миләүшә Айтуганова моны үткән ел жюри рәисе булган «Оскар»лы тавыш режиссеры, кинорежиссер һәм композитор Рәсүл Пукутти исеме белән бәйләп аңлатса да, «Татаркино»ның яңа җитәкчесе Ильяс Гафаров та моңа этәргеч булырга мөмкин – чөнки Ильяс Гафаров яңа заман татар альтернатив музыкасы нигезендә торган музыкант буларак билгеле.
- Ильяс Гафаров - татар альтернатив, инди һәм электрон музыкасын дөньяга чыгаручы Yummy Music лейблына нигез салучы, татар музыкасы тарихында калган Ittifaq төркеме катнашучысы буларак та калыр, шулай ук тарихка күчкән Tat Cult Fest фестиваленең оештыручысы, хәзер аны «ДәртФест» алыштырды. 2025 елның азагыннан ул «Татаркино»ның генераль директоры.
Миләүшә Айтуганова: «Фестивальдә катнашучылар һәм жюри әгъзалары фильмны чыгаруда композиторларның һәм тавыш режиссерларының өлешен күптән билгеләделәр инде. Былтыр фестивальдә Рәсүл Пукутти катнашкач, бу аеруча актуальләште. Музыка һәм тавыш яңгырашы – кино сәнгатенең әһәмиятле элементы, ул картинаның эмоциональ тирәнлеген ача һәм тамашачының эмоцияләренә ныклап тәэсир итә ала. Шуңа да бу номинацияләрне кертү үзен аклый һәм безнең форум өчен бик актуаль».
- Конкурска гаризалар 2026 елның 1 июненә кадәр кабул ителә. Моның өчен фестивальнең рәсми почтасына язарга яки рәсми сайтында махсус анкетаны тутыру кирәк.
- Фестиваль 2026 елның 4 – 8 сентябрендә үтәчәк.