“ქარწაღებულნი” – უცნობი ფაქტები ლეგენდარული ფილმის ეკრანიზაციის შესახებ
ყველა დროის ერთ-ერთი ყველაზე დიდებული და ცნობილი რომანის დაწერის მიზეზი არც მეტი, არც ნაკლები მოწყენილობა გახდა. მარგარეტ მიჩელი ჟურნალისტად მუშაობდა, როდესაც მუხლი დაიზიანა. ვიდრე გამოკეთდებოდა, შვებულება აიღო, ხოლო დროის გაყვანა და თავის შექცევა წერით გადაწყვიტა.
მიუხედავად იმისა, რომ მარგარეტი რომანზე მთელი დეკადის განმავლობაში მუშაობდა, ამ ამბის შესახებ არავინ იცოდა. არც მეგობრებმა და არც ოჯახის წევრებმა. იგი ამას საგულდაგულოდ მალავდა. მას არც რომანის გამოქვეყნება სურდა, იქამდე, ვიდრე მისმა მეგობარმა შემთხვევით არ გაიგო სიმართლე.
მიჩელი შეიძლება იმ ადამიანების სიას დავამატოთ, რომლებმაც არ იციან, როგორ დასრულდა საბოლოოდ სკარლეტის და რეტის ურთიერთობა. “რეტმა შეიძლება იპოვა ვინმე, ნაკლებად რთული”, – განუცხადა მან Yank Magazine-ს 1945 წელს.
მიუხედავად იმისა, რომ რომანი დღეს უზომოდ პოპულარულია, თავის დროზე აღრფთოვანება სულაც არ მოჰყოლია. რალფ ტომპსონმა, New York Magazine-ს კრიტიკოსმა, მას აბსურდული და ისტორიასთან შეუსაბამო უწოდა და თქვა, რომ მარგარეტს ხედვა არ ჰქონდა.
ამერიკელმა კინოპროდიუსერმა დეივიდ სელზნიკმა, ფილმის გადასაღებად, რომანზე უფლება 50 000$ შეიძინა. ეს ყველაზე დიდი თანხა იყო, რაც იქამდე სცენარისთვის გადაუხდიათ. თუმცა მიჩელმა უარი თქვა გადაღებებში მონაწილეობაზე. მას დიდად არ ხიბლავდა ცნობადობა და პოპულარობა.
1949 წლის 11 აგვისტოს, როდესაც მარგარეტი თავის მეუღლესთან ერთად ფილმის სანახავად მიდიოდა, მას მანქანა დაეჯახა. მწერალი რამდენიმე დღეში მიყენებული დაზიანებების შედეგად გარდაიცვალა.
“ქარწაღებულნი” ყველა დროის ყველაზე რომანტიკულ ფილმადაა აღიარებული და რეკორდული, 11 ოსკარი აქვს მოპოვებული. იგი “ჰოლივუდის ოქროს ხანის” ყველაზე გამორჩეული ნამუშევარია.
წყარო/ფოტო: Mental Floss