ვატო შაქარიშვილი: დაუანონსებიათ იმ ჩავარდნილ ლექციას პარლამენტის წინ საჯაროდ ჩავატარებთო… უბრალოდ იყვირებენ ძველ-ახალ უნიჭო შეძახილებს
„დაუანონსებიათ იმ ჩავარდნილ ლექციას პარლამენტის წინ საჯაროდ ჩავატარებთო… გარწმუნებთ, რაც ბორჯომში უნდა ეთქვათ ბავშვებისთვის, იმის მეასედს ვერ ილაპარაკებენ დღეს საჯაროდ, უბრალოდ იყვირებენ ძველ-ახალ უნიჭო შეძახილებს“, – ამის შესახებ საზოგადოებრივი მოძრაობის „საქართველო უპირველს ყოვლისა“ დამფუძნებელი ვატო შაქარიშვილი სოციალურ ქსელში წერს.
შაქარიშვილის განცხადებით, რაც „გირჩი – მეტი თავისუფლების“ წარმომადგენლებს და მათ ლიდერს ბორჯომში დაგეგმილ სემინარზე ახალგაზრდებისთვის უნდა ეთქვათ, იმ გზავნილების საჯაროდ გაჟღერების შემთხვევაში, ზურაბ ჯაფარიძის პარტიას არა მხოლოდ მათი მოძრაობა, არამედ მთელი საქართველო დაუპირისპირდება.
„დაუანონსებიათ იმ ჩავარდნილ ლექციას პარლამენტის წინ საჯაროდ ჩავატარებთო… გარწმუნებთ, რაც ბორჯომში უნდა ეთქვათ ბავშვებისთვის, იმის მეასედს ვერ ილაპარაკებენ დღეს საჯაროდ, უბრალოდ იყვირებენ ძველ-ახალ უნიჭო შეძახილებს – რუსულად მოვიდნენ, რუსულად გვითხრეს, რუსულად… რუსულად…რუსულად… საელჩოებიც აღშფოთდებიან, ენჯეობიც გაგიჟდებიან, ალბათ „ხელოვნების“ წარმომადგენლები მორიგ კოლექტიურ წერილსაც მოაწერენ ხელს კლასიკურ ბოლშევიკურ სტილში… ბორჯომში რაც უნდა ელაპარაკათ, ის რომ საჯაროდ თქვან, მარტო ჩვენი მოძრაობა კი არა, მთელი საქართველო გარეთ გამოვა და გადათელავს ამ ანტიქართველებს! რა ქნან, ეტკინათ სიმართლე და მართალი ხალხის პოზიცია – სხვათა შორის გამოხატვის თავისუფლების ფარგლების სრული დაცვით! საქართველო უპირველეს ყოვლისა!“ – წერს ვატო შაქარიშვილი ფეისბუკზე.
ცნობისთვის, თსუ-ს სტუდენტებმა ამავე უნივერსიტეტთან აქცია დააანონსეს. აქციის ორგანიზატორები უნივერსიტეტიდან ირაკლი კობახიძის გათავისუფლებასა და იმ ადამიანების დასჯას მოითხოვენ, რომლებიც 17 ივნისს „გირჩი მეტი თავისუფლების“ ლიდერს ზურაბ ჯაფარიძეს და „ინდივიდუალური თავისუფლების ინსტიტუტის“ ბანაკში მყოფ ადამიანებს თავს დაესხნენ. ბანაკში შეკრებილი ადამიანებისთვის ზურაბ გირჩი ჯაფარიძე ლექციის ჩატარებას გეგმავდა.
„ინდივიდუალური თავისუფლების ინსტიტუტის“ განცხადებით, მათ ბანაკში მყოფ ადამიანებს ესროლეს ქვები და საღებავები.