د ایتوپیا په پېښه کې د "م.م" د سازمان ۲۱ کارکوونکي وژل شوي
د ملګروملتونو سرمنشي انتونیو ګوترش پرون د ښځو د وضعیت د کمېسیون د کلنۍ غونډې د پرانېستو پر مهال په خپله وینا کې دا پېښه په تېره د ملګروملتونو لپاره لویه غمیزه وبلله:
"په ایتوپیا کې دې ناوړه هوايي سانحې د وروستیو معلوماتو له مخې د ملګرو ملتونو د ۲۱ کارکوونکو په ګډون د ټولو سپرلیو او پر دې سربیره په نامعلوم شمېر د هغو کسانو ژوند واخېست چې له ملګرو ملتونو سره یې له نژدې کار کاوه."
د ایتوپیا د هوايي شرکت بوینګ ۷۳۷ ماکس ډوله الوتکه د تېرې یکشنبې په ورځ د دې هېواد د پلازمېنې اُدیسه بابا له هوایي ډګره له پورته کېدو لږ ځنډ وروسته را وغورځېده او ټولې ۱۵۷ سپرلې یې له منځه ولاړې.