په پکتیکا کې پر ۶۵۰ جریبه ځمکه د تازه مېوو نوي باغونه جوړېږي
د کرنې، اوبو لګولو او مالدارۍ وزارت ویاند اکبر رستمي نن د دوشنبې په ورځ «۱۳۹۸ کال د وري ۱۲» ازادي راډيو ته وویل چې دغه پروګرام د بڼوالۍ او مالدارۍ ملي برنامې «NHLP» له لارې پلې کېږي.
له دې لارې به د پکتیکا ولایت په مرکز ښرنه او د دې ولایت په جانيخېل او خیرکوټ ولسوالیو کې د راتلونکو څو میاشتو په جریان کې پر ۶۵۰ جریبه ځمکه نوي مېوه لرونکي باغونه جوړ شي.
د پکتیکا د کرنې ریاست چارواکي وایي چې د مېوو نوي باغونو جوړول پهدې ولایت کې د بڼوالۍ په برخه کې بې ساري پرمختګ دی.
د بڼوالۍ او مالدارۍ ملي برنامه «NHLP» پر دې سربېره، کروندهګرو سره د باغونو په نقشه اچولو، د اوبو لګولو د سيسټم په جوړولو او د بڼوالۍ د مديريت اړوند ځينو نورو برخو کې هم تخنيکي او فني مرستې کوي