په يمن کې د سعودي تر مشرۍ لاندې ائتلاف ١١ کسان وژلي
ځايي روغتيايي چارواکو دا خبره پرون کړې ده.
حمله د يمن په پلازمېنه کې شوې چې د ياغيانو په کنټرول کې ده.
د ياغيانو تر ولکې لاندې سيمه کې د روغتيا وزارت وياند يوسف الحدري وويل: د صنعا د استوګنې پر يوه سيمه پر کورونو او يوه ښوونځي د بمبارۍ زياتره وژل شوي کسان زده کوونکي دي.
خو د سعودي تر مشرۍ لاندې ائتلاف پهدغه سيمه کې د هوايي حملو راپورونه رد کړي دي.
د يمن حکومت چې سعودي عربستان او د عربستان پوځي متحدان يې ملاتړ کوي، له ٢٠١٥میلادي کال راهيسې د حوثي ياغيانو پر ضد چې ايران يې ملاتړ کوي، په جګړه بوخت دي.
د يمن په شخړه کې ډېر زيان ملکيانو ته رسېږي چې تراوسه پهدې شخړه کې تر ١٠زره ډېر کسان وژل شوي دي.
ملګرو ملتونو دا د نړۍ په سطحه تر ټولو بد بشري بحران بللى دى.