د څرخي پله زندان ٥٠ بستريز روغتون له وړ تجهيزاتو برخمنيږي
په سپيدار ماڼۍ کې د زندانونو د عالي شورا په پرونۍ غونډه کې چې مشري يې اجرائيه رئيس عبدالله عبدالله کوله، د زندانيانو پر ستونزو بحث وشو.
د اجرائیه رئیس مرستیال ویاند فریدون خوځون ازادي راډیو ته وویل، پهدې اړه یوه کمېسیون ته دنده وسپارل شوه:"پهدې غونډه کې د زندانونو د ستونزو د حل په څرنګوالي باندې ځینې تصامیم ونیول شول. دا چې په مرکزي زندان یا څرخي پله زندان کې تر کار لاندې ۵۰ بستره روغتون څنګه په مکمله امکاناتو جوړ شي. دا هم بحث وشو چې د افغانستان د زندانیانو شته ستونزې څنګه حل شي."
د څرخي پله زندانیان تل د ګڼو نورو ستونزو تر څنګ د لازمو روغتیايي خدماتو له نشتوالي شکایت کوي.
اجرائيه رياست وايي، د سره صلیب نړیوالې کمېټې پرون د زندانونو عالي شورا ته د څرخي پله او بګرام زندانونو په اړه خپل راپور وړاندې کړ او په هغه کې یې د زندانیانو د دوسيو په څېړلو کې د ځنډ په اړه اندېښنه ښوولې ده.