د نواز شریف ناروغۍ له کبله محکمې د نورو دوو میاشتو لپاره خپل حکم وځنډاوه
د اسلام اباد عالي محکمې پرون (اکټوبر ۲۹مه) دا پرېکړه په داسې حال کې اعلان کړله، چې ٦٩ کلن شريف ته د ورکړل شوي لنډمهاله ضمانت موده په ختمېدو وه.
د پاکستان د صدراعظم عمران خان د مطبوعاتو او خپرونو ځانګړې مرستیالې فردوس عاشق اعوان پرون په دې اړه وویل، د ښاغلي شریف خراب روغتیايي حالت ته په پام سره دا پرېکړه شوې ده.
اغلې اعوان زیاته کړه: "موږ پوره هیله من یو چې میا صاحب [نواز شریف] خپل علاج باندې پام وکړي. په کوم مقصد چې هغوی ته حکم ورکړل شوی هیله ده ژر تر ژره صحتمند شي."
نواز شريف چې د اداري فساد په تور په ٧ کاله بند محکوم شوى، د اکتوبر پر ٢١مه د ناروغۍ له کبله روغتون ته ولېږدول شو.
د پاکستان پخوانى صدراعظم نواز شريف دا مهال د ختيځ ښار لاهور په يوه روغتون کې بستر دى.
د هغه معالج ډاکټر عدنان خان وايي، نواز شريف په بد صحي وضعيت کې دى او د زړه له حملې هم کړېږي.
نواز شريف د اداري فساد تورونه رد کړي او وايي دغه تورونه سياسي انګېزه لري.