Болгарда ачылган «30/40» форумында урта яшьтәге мөселманнарга дәресләр үткәрелә
(Казан, 3 гыйнвар, «Татар-информ»). Болгар ислам академиясе бинасында Татарстан мөселманнары Диния нәзарәтенең «30/40» мөселман форумы үз эшен башлап җибәрде. Укулар 2-5 гыйнвар көннәрендә уза, дип хәбәр итә Диния нәзарәте матбугат хезмәте.
«30/40» форумы Аллаһның күркәм исемнәре темасына багышланган. Дәресләр экскурсияләр һәм күңел ачу программалары белән чиратлап алып барылачак.
Форумда 30-40 яшьлек 40 кеше катнаша. Алар Татарстаннан гына түгел, шулай ук Мәскәү, Чиләбе, Ульяновск, Оренбург өлкәләреннән, Башкортстан Республикасыннан да килгән.