Сызраньда «Туган тел» мәдәният үзәге оешканга 30 ел тулды
(Казан, 4 декабрь, «Татар-информ»). Сызрань шәһәренең «Туган тел» татар мәдәни үзәге оешыгуа 30 ел булды. Бу турыда «Самар татарлары» сайты хәбәр итте.
Оешманы отставкадагы авиация полковнигы, хәрби очучы, мөгаллим Галиулла Габдрәшитов инициативасы белән ачканнар. «Ул милли җанлы, актив кеше буларак, ул Сызрань татарларында милли үзаң уяту, берләштерү теләге белән гомере буе янып яши һәм, 1990 елларда андый мөмкинлек күренгәч тә, ярдәм сорап үзенең җитәкчесенә — генерал-майор Алексей Федорович Базаровка мөрәҗәгать итә. Һәм ул ярдәм кулы суза», — дип сөйли оешманың хәзерге җитәкчесе Наил Йосыпов.
«Без тиз арада җыелышка чакыру билетларын ясап тараттык. Билгеләнгән көнне ике йөздән артык татар җыелды. Бер ел элек кенә оешкан „Туган тел“ өлкә татар милли-мәдәни җәмгыятеннән Рәшит Абдуллов һәм Шамил Баһаутдинов та килделәр», — дип искә алган Галиулла Габдрәшитов үзе.
Җыелышта катнашучылар Сызрань татарларының беренче иҗтимагый оешмасын — «Туган тел» татар мәдәнияте үзәген булдыралар һәм рәисе итеп Галиулла Габдрәшитовны сайлыйлар, диелә бу хәбәрдә.