Тагын шартлата язганнар!
Татарстанда терроризмга каршы эш башкарыла. 9 декабрьдә полиция хезмәткәрләре оператив хезмәтләрнең әзерлеген тикшерде.
Анысы Ленин урамында урнашкан сәүдә үзәге территориясендә булды. Гади киемнән киенгән полиция хезмәткәрләре чыбыклар уралган предмет – шартлаткыч җайланма муляжын куеп читкә китүгә үк аны сатучылар күреп ала. Алдан үткәрелгән инструктаж буенча бу хакта куркынычсызлык хезмәтенә, алары исә полициягә хәбәр итә. Барлык хезмәтләр килеп, операция башланганчы биредә эвакуация уздырылып, муляж салынган территория сак ленталары белән тотып алынган була. Саперлар “бомбаны” шартлау дулкыны көчен азайтырга мөмкинлек бирүче япма – “Фонтан” локализаторы белән каплаганнан соң, аны эт тикшерә. Ул шикләнерлек әйберләр тапмагач, “операция уңышлы узды” нәтиҗәсе белән барлык службалар да урыннарына таралыша.