Թրամփը ցույց տվեց, որ ավելի շատ վստահում է ՊԱԿ-ի նախկին գործակալին, քան ԱՄՆ-ի հետախուզությանը. The Guardian-ի վերլուծականը
Բրիտանական Тhe Guardian պարբերականն անդրադարձել է վերջին երկու օրվա, թերևս, ամենաշատ քննարկված քաղաքական թեմային՝ Պուտին-Թրամփ հանդիպմանը, որի ժամանակ երկու պետությունների ղեկավարներն ավելի քան 2 ժամ տևողությամբ առանձնազրույց են ունեցել:
Պարբերականի դիվանագիտական վերլուծությունների բաժնի խմբագիր Պատրիկ Վինտուրը նկատում է, որ «ԱՄՆ նախագահ Թրամփը Եվրոպայից Հելսինկի էր ժամանել մեղայականով»: Նա հիշեցնում է Թրամփի՝ Պուտինի հետ հանդիպումից առաջ արած հայտարարությունն այն մասին, որ «Ռուսաստանի հետ Վաշինգտոնի հարաբերությունները «դեռ երբեք այսքան վատ չէին եղել» և որ «դա Միացյալ Նահանգների բազմամյա անխելքության ու հիմարության հետևանք է»:
«Այս նախադասությամբ Թրամփը Պուտինին արդարացրեց նախորդ տասնամյակում ցուցաբերած վարքի համար՝ մեղքը բարդելով ԱՄՆ-ի ուսերին: Փաստացի Թրամփը Հելսինկի գնաց իր երկրի անունից մեղայականով»,-գրում է Վինտուրը:
Հոդվածագիրն ուշագրավ է համարում նաև այն հանգամանքը, որ ԱՄՆ նախագահը չպահեց իր խոստումն ու ռուս պաշտոնակցի հետ քննարկելիք թեմաները նշելու ժամանակ ոչ մի խոսք չասաց Ռուսաստանի՝ 2016թ. ԱՄՆ-ում կայացած նախագահական ընտրություններին հավանական միջամտության ու Ուկրաինայի հարավ-արևելքում տիրող իրավիճակի վերաբերյալ: Բայց օրեր առաջ Թրամփը խոստացել էր, որ այս երկու հարցերն անպայման քննարկվելու են հելսինկյան դեմառդեմ հանդիպման ժամանակ:
«Իրենց համատեղ 45 րոպեանոց մամուլի ասուլիսի ժամանակ Թրամփը զիջեց Պուտինին՝ թույլ տալով նրան անել բացման հայտարարությունը՝ դեմառդեմ հանդիպման արդյունքների ամփոփումը»,-նկատում է Վինտուրը:
Հեղինակի համար զարմանալի է այն փաստը, որ ԱՄՆ նախագահը հլու-հնազանդության աստիճանի հասնող հարգալից տոնով է խոսում Պուտինի ու Ռուսաստանի մասին, և դա խիստ հակադրվում է ՆԱՏՕ-ի, եվրոպական դաշնակիցների հասցեին հնչող վիրավորանքներին:
Բացի այդ, Վինտուրը գտնում է, որ Թրամփի՝ Հելսինկիում Պուտինի նկատմամբ պահվածքն ամենամեծ հարվածն էր հատկապես Մեծ Բրիտանիայի համար: Հայտնի է, որ Վաշինգտոնն ու Լոնդոնը 1945թ. ի վեր ամենամտերիմ դաշնակիցներն են, մինչդեռ Մեծ Բրիտանիան ու Ռուսաստանը վերջին շրջանում խիստ բարդ ու լարված հարաբերություններ ունեն:
«ԱՄՆ-ի ու Մեծ Բրիտանիայի հարաբերությունները հիմնված են պատմության թելադրանքով ստեղծված հավատարմության, հետախուզական ոլորտում ակտիվ համագործակցության վրա: Սակայն Լոնդոնն այժմ պետք է ընդունի այն փաստը, որ ԱՄՆ նախագահն ավելի շատ պատրաստակամ է վստահել ՊԱԿ-ի (КГБ) նախկին գործակալին, քան սեփական երկրի հետախուզությանը»,-գրում է Վինտուրը՝ նկատի ունենալով այն հանգամանքը, որ ԱՄՆ հետախուզությունը պնդում է Մոսկվայի՝ ԱՄՆ-ում կայացած նախագահական ընտրություններին միջամտելու հարցում, մինչդեռ Թրամփը հրաժարվում է ընդունել դա:
«Ի վերջո, Թրամփն արեց մի սպանիչ արտահայտություն, որը հավանաբար սարսուռ առաջացրեց արևմտյան բոլոր հետախուզական գործակալություններում: Նրա ասածը հետևյալն էր. «Ես խոսեցի նախագահ Պուտինի հետ, և նա ասաց, որ Ռուսաստանը կապ չունի: Եվ ես իրոք դրա համար (Մոսկվայի միջամտության- tert.am) պատճառ չեմ տեսնում»,-նախագահի խոսքը մեջբերում է հեղինակը:
Վինտուրն իր անդրադարձն ավարտում է այն եզրահանգմամբ, որ Թրամփի դաշնակիցն ամենևին էլ չի գտնվում Եվրոպայի արևմուտքում: