Թուրքական հատուկ ծառայություններն Ուկրաինայի տարածքից առևանգել են թուրք գործարարի ու լրագրողի․ լրատվամիջոցներ
Թուրքական հատուկ ծառայություններն Ուկրաինայի տարածքից առևանգել են թուրք գործարարի ու լրագրողի և տեղափոխել նրանց Թուրքիա, այս մասին գրում է Страна.ua-ն։
Հայտնի է, որ առևանգվածներն Օդեսայից թուրք գործարար Սալիհ Զեքի Յիղիթն ու Նիկոլաևից լրագրող Յուսուֆ Ինանն են։
Ընդ որում՝ Յիղիթին առևանգումից անմիջապես հետո տարել են Օդեսայում Թուրքիայի հյուպատոսարան, որտեղից էլ նրան տեղափոխել են հայրենիք։
Թուրքական diken.com.tr կայքը նշել է, որ Թուրքիայի հետախուզական կոմիտեն նմանատիպ գործողություն է իրականացրել նաև Ադրբեջանի տարածքում, առևանգվածները Թուրքիայում կասկածվում են ահաբեկչական խմբավորումներին (այդ թվում Թուրքիայում հեղաշրջման փորձի իրականացման համար մեղադրվող թուրք կրոնական քարոզիչ Ֆեթուլլահ Գյուլենի «Հիզմեթ» կրոնական շարժմանը) աջակցելու և հակապետական քարոզչություն իրականացնելու համար։
Հայտնի է, որ այդ անձանց՝ Թուրքիա արտաքսման համար Ուկրաինայի տարածքում որևէ դատական որոշում չէր կայացվել։ Ավելին՝ Թուրքիայի նախագահ Ռեջեփ Թայիփ Էրդողանի խոսնակը, ըստ ուկրաինաբնակ թուրք լրագրող Յունուս Էրդօղլուի, շնորհակալություն է հայտնել Ուկրաինայի իշխանություններին իրականացված գործողությունների շրջանակում իրենց աջակցելու համար։
«Ինչպե՞ս մենք կարող ենք վստահել նրանց, ովքեր համագործակցում են էրդողանական հատուկ ծառայությունների հետ», - ասել է Էրդօղլուն։ Նա նաև հայտնել է, որ թուրքական իշխանությունները հատուկ ցուցակ են կազմել՝ նշելով Ուկրաինայում բնակվող այն մարդկանց, ում պետք է առևանգել։