«Терминатор» Трампга қарши: «Сиз ватанни сотдингиз» (видео)
Собиқ сиёсатчи, 2003-2011 йилларда АҚШнинг Калифорния штати губернатори бўлган Арнольд Шварценеггер 16 июль куни бўлиб ўтган Дональд Трамп ҳамда Владимир Путин иштирокидаги учрашув ҳақида муносабат билдирар экан АҚШ раҳбарини кескин танқид қилган видеомурожаатни эълон қилди.
«Жаноб Трамп, ҳозиргина сизнинг иштирокингиздаги матбуот анжуманини кўрдим. Сиз у ерда «аммамнинг бузоғи»га ўхшаб турдингиз ва ўзингизни худди Путиннинг фанатидек тутдингиз. Путиндан дастхат сўрамасайдингиз ёки у билан селфига тушмасайдингиз, деб қўрқиб турдим.
Бу анжуманда сиз бизнинг разведкамизни, ҳуқуқ тизимимизни сотдингиз. Энг даҳшатлиси, сиз ватанимизни сотдингиз. Сизга нима бўлди? Рональд Рейган Берлин девори олдида туриб: «Жаноб, Горбачев, бу деворни бузиб ташланг», деганди. Ўша буюк сўзлардан нима қолди ахир?»,- дейилади мурожаатда.
Аввалроқ Шварценеггер Путин билан учрашувда Трампни «қайнатилган макарон»га ўхшатганди.
Трамп Хельсинкида ўтган Путин билан учрашувдан кейин кескин танқидлар остида қолиб кетди. Америкаликлар Россияни ўзларига рақобатчи ёки иттифоқчи эмас, душман сифатида билишади. Трампнинг русларга, хусусан Путинга нисбатан юмшоқ муносабати эса АҚШ фуқароларининг ғазабини келтирмоқда. АҚШ матбуоти кўплаб амалдаги ва собиқ сиёсатчиларнинг Трампни танқид қилган чиқишларини эълон қилишдан тўхтамаяпти.