Որոշակի հիմքեր կան պնդելու, որ կլինեն թոշակային բարձրացումներ. Արծվիկ Մինասյան (տեսանյութ)
Դեպի դրական բարեփոխման մեջ ենք. Tert.am-ի հետ զրույցում ասաց ՀՀ տնտեսական զարգացման և ներդրումների նախարար Արծվիկ Մինասյանը՝ պատասխանելով այն հարցին, թե երբ կլինեն սոցիալական բարեփոխումներ և մարդիկ կզգան դրական փոփոխությունները:
Դիտարկմանը, թե տևական ժամանակ է իշխանության եք, կա՞ն արդյոք ռեսուրսներ թոշակներն ու աշխատավարձերը բարձրացնելու համար, Մինասյանը պատասխանեց. «Տևական ժամանակը մի քիչ հարաբերական է: Ես հասկանում եմ հասարակության սպասումները՝ կտրուկ, արագ փոփոխությունների, բայց ուզում եմ այդքան չշտապեն: Ցանկացած բարեփոխում ժամանակ է պահանջում, այն խորքային վերլուծություն է ենթադրում: Ամեն դեպքում, կարծում եմ, որ բոլորը հասկանում են՝ մենք դեպի դրական բարեփոխման մեջ ենք»:
Նախարարի խոսքով՝ կառավարությանը պետք է հնարավորություն տալ հեռահար ու խորքային փոփոխությունների արդյունքում դրականը երկարաժամկետ դարձնել:
«Ամենահեշտը պոպուլիստական հայտարարություններն են, ասելը, որ կտրուկ բարձրացնում ենք թոշակն ու աշխատավարձը, իսկ հետո չկարողանալ այդ պարտավորությունը երկարաժամկետ կտրվածքով տանել: Փոփոխությունները նախատեսված են, նախաձեռնված են, բայց այս ամենի համար միայն էմոցիան չէ, համակարգերի փոփոխությունն է, մենք ինստիտուցիոնալ նոր միջավայրի ձևավորման փուլում ենք»,- ասաց Ա. Մինասյանը:
Տնտեսական զարգացման և ներդրումների նախարարը հայտնեց, առաջիկայում, երբ մեկնարկի Ազգային ժողովի հերթական նստաշրջանը, ականատեսը կդառնանք օրենսդրական բազմաթիվ նոր նախագծերի:
«Կենսաթոշակային համակարգում ռեֆորմների վերանայման փուլում ենք: Քանի դեռ այս ռեֆորմն ամբողջությամբ չենք լուծել, չենք կարող կտրուկ զարգացումների մասին խոսել, բայց պաշարը կուտակվում է: Համոզված եմ, որ բյուջետային հաջորդ տարվա քննարկումների ժամանակ լինելու են բարձրացումներ, բայց թույլ տվեք այս պահին չհրապարակել ոչ միայն թիվը, այլև՝ հնարավոր ծավալները: Որոշակի հիմքեր կան պնդելու, որ կլինեն թոշակային բարձրացումներ»,- հայտնեց Արծվիկ Մինասյանը:
Մանրամասները՝ տեսանյութում: