ბრიტანეთის პარლამენტმა უარყო ბრექსიტის შესახებ ევროკავშირთან შეთანხმების გეგმა
მანამდე ბრიტანეთის პარლამენტში გამოსვლისას, პრემიერ-მინისტრმა ტერეზა მეიმ განაცხადა, რომ თუ დეპუტატები მხარს არ დაუჭერენ შეთანხმებას, საქმე შესაძლოა საერთოდ არ მივიდეს ბრექსიტამდე. მან მოუწოდა ყველას, ვინც საჭიროდ მიიჩნევს ევროკავშირიდან ბრიტანეთის გასვლის შესახებ რეფერენდუმის შედეგის შესრულებას, მხარი დაუჭიროს შეთანხმების პროექტს.
ორშაბათ-სამშაბათის ღამეს, სტრასბურგში ევროკავშირის ლიდერებისა და ტერეზა მეის მოლაპარაკების შედეგად მიაღწიეს ცვლილებებს ბრექსიტის შესახებ შეთანხმებაში.
მაგრამ დიდი ბრიტანეთის გენერალური პროკურორის ჯეფრი კოკსის შეფასებით, არც ამ ცვლილებებით არის გარანტირებული, რომ ბრიტანეთი ცალმხრივი წესით შეძლებს უარის თქმას „ბექსტოპად“ წოდებულ მექანიზმზე, რომელსაც შეთანხმების პროექტი ითვალისწინებს.
„ბექსტოპი“ ნიშნავს, რომ სანამ ბრიტანეთი და ევროკავშირი ვერ შეთანხმდებიან ირლანდიის საზღართან დაკავშირებულ რეჟიმზე, ბრიტანეთმა კვლავინდებურად უნდა დაიცვას ევროკავშირის საბაჟო და სხვა წესები.
პირველ რიგში, სწორედ „ბექსტოპი“ იწვევს უკმაყოფილებას ბრექსიტის მომხრეებში. იმის გათვალისწინებით, რომ ტერეზა მეის გეგმას ასევე ეწინააღმდეგებიან ლეიბორისტები და სხვა ოპოზიციური პარტიების წევრები, წინასწარვე ვარაუდობდნენ, რომ პრემიერ-მინისტრი ვერ მიიღებდა საკმარის ხმებს ევროკავშირთან შეთანხმებული დოკუმენტის დასამტკიცებლად.