“საქართველოში იყო ზურაბ დათუნაშვილი, მაგარი კაცი, მაგრამ …”
“ვულოცავ ზურაბ დათუნაშვილს გამარჯვებას. დაახლოებით მაინც ვიცი რას გრძნობდა სერბეთის ჰიმნის მოსმენისას, რომლითაც მისი გამარჯვება აღნიშნა ევროპამ.
სიმბოლური პიროვნებაა ეს კაცი. სამშობლოში დამცირებული, შეურაცხყოფილი, თავისი ნებით გარიდებული, რადგან “საცა არა სჯობს, გაცლა სჯობს, კარგისა მამაცისაგან”; გაბრაზებული, მაგრამ არა დაბოღმილი, ამიტომ ჯანმრთელად მოტივირებული.
ზურაბ დათუნაშვილი პასუხია სულელურ ყვედრებაზე: – ჩამოდი და აქ ემსახურე შენს სამშობლოს -. საქართველოში იყო დათუნაშვილი, მაგარი კაცი, მაგრამ …
“საცა არა სჯობს, გაცლა სჯობს, კარგისა მამაცისაგან”.
სიხარულის და სევდის, სიამაყის და დათრგუნულობის, მაგრამ არა ნიშნისმოგების გემო აქვს ასეთ გამარჯვებას.
და რა არის სამშობლო? სამშობლო ის ხალხია, რომელმაც წასვლა გაიძულა, თუ ისინი, ვისაც შენი გამარჯვება ისევ გაუხარდა, მაგრამ ვერ დაგიცვა? ორივე ერთად?
ეტყობა მაინც მთები და ველებია სამშობლო; ნაცნობი მთები და ველები …
გილოცავ ზურაბ დათუნაშვილო! გამარჯვებით გევლოს!” – წერს ზურაბ გურული სოციალურ ქსელში.
ცნობისათვის, ბერძნულ-რომაული სტილით მოჭიდავე ზურაბ დათუნაშვილი ევროპის ჩემპიონი მესამედ გახდა. 2016 და 2017 წლებში ტიტული საქართველოს სახელით მოიპოვა. ამჯერად კი მისი წარმატებით სერბებმა იხეირეს. ვარშავაში მიმდინარე ევროპირველობის ფინალში დათუნაშვილმა ბელარუსი კირილ მასკევიჩი დაამარცხა. ზურაბ დათუნაშვილი სერბეთის ნაკრებში 2020 წლის დასაწყისში გადავიდა, საქართველოს ჭიდაობის ეროვნული ფედერაციის პრეზიდენტ თამაზ გეგეშიძესთან დაპირისპირების გამო. 2019 წლის 11 იანვარს, თბილისის სპორტის სასახლეში გამართულ საქართველოს ჩემპიონატზე, გეგეშიძემ მას ფიზიკური შეურაცხყოფა მიაყენა.