Пассажирның хәле начараю сәбәпле, самолет Казан аэропортына төшәргә мәҗбүр булган
(Казан, 16 июль, «Татар-информ», Эвелина Киселева). Ямал-Ненец автономияле округындагы вахта бистәсе – Сабеттадан Самарага юл тоткан самолет, бер пассажирның хәле начараю һәм Самарада һава торышы көйсезләнеп китү аркасында, Казан аэропортына төшәргә мәҗбүр булган. Бу хакта «Татар-информ» агентлыгына Татарстан Сәламәтлек саклау министрлыгының матбугат хезмәтеннән хәбәр иттеләр.
«Пассажирны Республика клиник хастаханәсенә китерделәр, табиблар аны карады, хәле тотрыклы һәм уртача авырлыкта дип бәяләделәр», - дип искәрттеләр матбугат хезмәтендә.
Пассажирның самолетта хәле начарайган, әмма һава торышы көйсезләнеп китү аркасында, очкыч маршрут буенча билгеләнгән шәһәргә төшеп утыра алмаган һәм «Казан» аэропортындагы запас аэродромга төшәргә мәҗбүр булган. Аны шуннан Республика клиник хастаханәсенә алып киткәннәр.
17.30 сәгатьтә табиблар тиешле барлык ярдәмне күрсәткәннән соң ир-атны амбулатор дәвалануга озаткан, хәзер аның сәламәтлегенә бернинди куркыныч та янамый.