Рөстәм Миңнеханов Казанда мобилизацияләнгәннәрнең шикаятьләренә җавап бирде
Татарстан Республикасы Президенты Рөстәм Миңнеханов республика оперштабы утырышында хәрбиләрнең барлык мәсьәләләрен тиз арада хәл итәргә һәм алар өчен хәрби әзерлек урыннарында яхшы көнкүреш шартлары булдыруны тәэмин итәргә кушты. Ул Казан танк училищесы базасында әзерлек узучы мобилизациялеләрнең шикаятьләренә шулай җавап бирде.
«Һәр җирдә тәртип булырга тиеш. Бу безне бер дә бизәми. Ничек кенә булмасын без боларга юл куярга тиеш түгел. Кешеләр белән ничек тә булса аңлашырга кирәк. Сез мөрәҗәгать итәсез бит – без теләсә кайсы мәсьәләне беренче чиратта хәл итәбез. Әгәр кешеләрнең көнкүреш, оештыру, хокукый сораулары бар икән – без бу мәсьәләләрнең барысын да хәл итәбез. Сезнең тарафтан төгәл эзлекле эш булырга тиеш. Бу сезнең генә җитешсезлек түгел – бу барыбызның да җитешсезлеге. Сез карагыз: палаткалар шәһәрчеге төзедек, барлык инфраструктураны төзедек. Әмма мондый мизгелләр булган икән, без дәшми кала алмыйбыз. Без монда бер гаилә кебек. Без барыбыз да җаваплы. Бу беренче чиратта, республика җитәкчесе буларак, минем адреска. Без кайдадыр, нәрсәнедер күреп бетермәгәнбез», - диде Республика Президенты.
Искәртеп үтик, узган шимбәдә Казан югары танк команда училищесы территориясендә мобилизацияләнгән 430 нчы мотоукчылар полкы хәрбиләре кайбер шартларга, шул исәптән утыннарның чи булуына һәм телефоннарга зарядка ясау урыннары җитмәүгә зарланды. Училищедан видеоларны социаль челтәрләрдә таратканнар. Чи утыннар белән проблема күптән түгел яңгыр һәм җепшек кар яву аркасында килеп чыккан. Мобилизацияләнүчеләрнең шикаятьләреннән соң, аерым палаткаларда телефоннарга зарядка җыйдыру өчен урыннар оештырылды.
Шулай ук Президент оператив штаб утырышында хәрби бурычлыларны исәпкә алуда тәртип оештырырга кушты.