Рособрнадзорда Бердәм дәүләт имтиханнарыннан ничә укучыны чыгарып җибәрүләрен әйттеләр
Имтиханнарда 900 дән артык укучы кагыйдәләрне бозган.
Быел бердәм дәүләт имтиханыннан (БДИ) кагыйдәләрне бозган өчен 900 дән артык кеше чыгарылган. РИА Новости хәбәр иткәнчә, бу хакта Мәгариф һәм фән өлкәсендә күзәтчелек буенча федераль хезмәт башлыгы Анзор Музаев сөйләгән.
«Кызганыч, быел да чыгарып җибәрүләрсез булмады, алар 969 кеше, 327се — элемтә чараларын кулланган өчен, 390ы — шпаргалкалар өчен, 252се — башка төр хокук бозулар өчен», — дигән Музаев бүген «БДИ кампаниясенең башлангыч нәтиҗәләре» матбугат конференциясендә, «Россия сегодня» медиатөркеменең Халыкара мультимедия матбугат үзәгендә.
Элегрәк хәбәр ителгәнчә, ачыкланган хокук бозулар аркасында Дагыстанда Бердәм дәүләт имтиханы һәм Төп дәүләт имтиханыннан 280 эш нәтиҗәләре гамәлдән чыгарылган.