Эрдоган – Миңнехановка: Сез төрки халыклар арасында мөнәсәбәтләрне ныгытырга ярдәм итәсез
Татарстан Республикасы Рәисе Рөстәм Миңнеханов Бөтендөнья этноспорт конфедерациясе президенты Нәҗметдин Билал Эрдоган белән очрашты. Эрдоган эш сәфәре белән безнең илдә. Очрашу барышында яклар спорт өлкәсендә алга таба хезмәттәшлек итү, булган элемтәләрне ныгыту һәм халыкара спорт ярышларында катнашу турында фикер алышты, дип хәбәр итә республика җитәкчесенең матбугат хезмәте.
Рөстәм Миңнеханов Татарстанга игътибары өчен Эрдоганга рәхмәт белдерде. Ул шулай ук Эрдоганның, Бөтендөнья этноспорт конфедерациясе президенты буларак, төрле халыклар, шул исәптән төрки телле дәүләтләр арасында мәдәни һәм спорт элемтәләрен үстерү өчен күпне эшләвен билгеләп үтте.
Моннан тыш ул Эрдоганга 2020 елдан Бөтендөнья этноспорт конфедерациясе составына керүче Халыкара көрәш федерациясен хуплавы өчен рәхмәт әйтте. 2022 елда Төркиядәге Бөтендөнья күчмә халыклар уеннары программасына күп гасырлык тарихы булган һәм төрки халыкларның бай мирасының аерылгысыз өлеше булып торган билбау көрәше кертелде.
Фото: © ТР Рәисе матбугат хезмәте
«Бу спорт төре уникаль – ул безнең халыкларның дини-мәдәни традицияләрен саклый һәм шул ук вакытта ул динамик үсештә», — дип ассызыклады Рөстәм Миңнеханов.
Нәҗметдин Билал Эрдоган Казанга чакыру өчен рәхмәт белдерде һәм бу сәфәрендә Бөек Болгарны барып күрергә өметләнүен әйтте. Ул Рөстәм Миңнехановның Татарстан Республикасы белән Төркия арасындагы мөнәсәбәтләрне үстерүгә керткән өлешен югары бәяләвен ассызыклады.
Фото: © ТР Рәисе матбугат хезмәте
«Сез төрки халыклар, Ислам илләре арасындагы мөнәсәтләрнең ныгуын тәэмин итүче кырны булдырасыз. KazanForum шундый берләштерә торган мәйданчык буларак хезмәт итә», — ди кунак. Ул белдергәнчә, Казандагы икътисади форум кебек вакыйгалар илләр арасындагы мөнәсәбәтләрне ныгытырга һәм үстерергә мөмкинлек бирә.