Геннадий Головкин ХОК жаңа ұйымына төраға болды
Қазақстан Ұлттық Олимпиадалық комитетінің президенті Геннадий Головкин Халықаралық бокс федерациясы (World Boxing) жаңа Олимпиадалық комиссиясының төрағасы атанды, - деп хабарлайды Tengrinews.kz тілшісі.
Қазақстанның Ұлттық Олимпиадалық комитетінің баспасөз қызметінің хабарлауынша, жұмыс барысында Қазақстан ҰОК басшысы World Boxing қызметінің ашықтығын қамтамасыз ету мәселелеріне қатысты халықаралық спорттық ұйымдармен бірлесе жұмыс істеуге көңіл бөледі.
Сонымен қатар оның комиссия басшысы ретіндегі басты міндеттерінің бірі – боксты Олимпиада ойындарының бағдарламасында қалдырып, World Boxing ұйымын ХОК мойындауы үшін Халықаралық Олимпиада комитетімен тығыз әріптестік орнату болмақ.
Айта кетелік, World Boxing Геннадий Головкиннің кандидатурасын алғашқылардың бірі болып бекітті. Жақын арада Олимпиадалық комиссия құрамына спорт әлемінің өзге де өкілдері еніп, боксты Олимпиадалық қозғалыс ортасында қалдыруға арналған ірі жоспарларды жүзеге асыруға күш салады.
World Boxing 2023 жылдың сәуірінде құрылды. Қазіргі таңда ұйым құрамына әлемнің 44 мемлекетіндегі Ұлттық федерациялар енген.
Мемлекеттік қызметтегі мансабы
Головкин – 2024 жылдың 27 ақпаны Қазақстан Ұлттық Олимпиада комитетінің президенті қызметіне тағайындалды. Спортшы өз өкілеттігін мерзімінен бұрын босаған Тимур Құлыбаевтың орнына келді.
"Өздеріңіз білетіндей, мен саясаткер де, шенеунік те емеспін. Мен өз ниетімді сөзбен емес, іспен дәлелдеуге дағдыланғанмын. Басты міндеттердің бірі – халықаралық қатынастарды нығайту", – деді боксшы.
Головкин – IBF, WBA және IBO нұсқалары бойынша екі дүркін әлем чемпионы. Ол Олимпиада ойындарының күмісін де жеңіп алды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!