Тожикистондан олиб келинган 50 кг опий фош этилди: юк машинасида яширилган

Хоразм вилоятидаги хавфсизлик хизмати ходимлари томонидан йирик миқдордаги гиёҳванд модда — опийни ноқонуний айланмадан фош этишга қаратилган тезкор тадбир муваффақиятли амалга оширилди.

Давлат хавфсизлик хизмати Хоразм вилояти бошқармаси маълум қилишича, тадбир давомида Сурхондарё вилояти Шеробод туманида яшовчи, 1990 йилда туғилган фуқаро шубҳа остига тушган. У бошқарувидаги DAF русумли юк машинаси орқали қарийб 50 килограмм — аниқроғи, 49 кг 599 грамм опий моддасини Қорақалпоғистон Республикасининг Тўрткўл туманига олиб келаётган пайтда ушланган.

Аниқланишича, гиёҳванд модда Тожикистон Республикасидан контрабанда йўли орқали Ўзбекистонга олиб кирилган ва Хоразм вилояти ҳудудида сотилиши кўзда тутилган. Мазкур модда юк машинасининг махсус яширилган қисмида жойлаштирилган бўлган.

Ҳозирда мазкур шахсга нисбатан Ўзбекистон Республикаси Жиноят Кодексининг 28,246-моддаси 2-қисми (“Гиёҳвандлик воситаларини қонуний муомаласи қоидаларини бузиш”) ва 273-моддаси 5-қисми (“Жуда кўп миқдорда гиёҳвандлик воситаларини сақлаш, ташиш”) бўйича жиноят иши қўзғатилди. Суд қарорига биноан айбланувчига нисбатан қамоқ эҳтиёт чораси қўлланилган.

Шунингдек, тергов доирасида унинг эҳтимолий жиноий шерикларини аниқлаш ва уларга нисбатан қонуний чора кўриш мақсадида қўшимча суриштирув ишлари олиб борилмоқда.

Zamin.uz таҳририяти ҳуқуқни муҳофаза қилувчи органлар томонидан ушбу каби йирик миқдордаги гиёҳвандлик жиноятларига қарши амалга оширилаётган ишларни ёритишда давом этади.