რომის პაპი ისრაელსა და ირანს დიალოგისკენ მოუწოდებს
რომის პაპი ისრაელსა და ირანს დიალოგისკენ მოუწოდებს. ინფორმაციას სააგენტო Reuters ავრცელებს.
რომის პაპის ლეო XIV ამბობს, რომ ახლო აღმოსავლეთში განვითარებულ მოვლენებს ის „დიდი შეშფოთებით“ აკვირდება.
„მსგავს დელიკატურ მომენტში მსურს კიდევ ერთხელ გავიმეორო ჩემი მოწოდება პასუხისმგებლობისა და გონიერებისკენ. ბირთვული საფრთხეებისგან თავისუფალი, უსაფრთხო სამყაროს შექმნისკენ სწრაფვა გულწრფელი დიალოგის გზით უნდა მოხდეს, რათა სამართლიანობაზე, ძმობასა და საყოველთაო კეთილდღეობაზე დაფუძნებული მდგრადი მშვიდობა შეიქმნას“, - ამბობს რომის პაპი.
მისი თქმით, „სხვის არსებობას საფრთხე არავინ უნდა შეუქმნას“.
„ყველა ქვეყნის ვალია, მხარი დაუჭიროს მშვიდობას შერიგებისკენ მიმავალი გზების შექმნითა და ისეთი გადაწყვეტილებების ხელშეწყობით, რომლებიც ყველასთვის უზრუნველყოფს უსაფრთხოებასა და ღირსებას“, - აღნიშნავს რომის პაპი.
13 ივნისს, გამთენიისას, ისრაელის პრემიერ-მინისტრმა ბენიამინ ნეთანიაჰუმ გამოაცხადა, რომ ირანში დაარტყეს „ბირთვული პროგრამის გულს“ - ურანის გამდიდრების მთავარ ობიექტს ქალაქ ნათანზში, ასევე ირანელ მეცნიერებს, რომლებიც ბირთვული ბომბის შესაქმნელად მუშაობდნენ და ბალისტიკური რაკეტების პროგრამის ცენტრს.
ირანის შეიარაღებული ძალების გენერალურმა შტაბმა დაადასტურა, რომ ისრაელის ავიადარტყმების შედეგად დაიღუპნენ გენშტაბის უფროსი, გენერალ-ლეიტენანტი ბაღერი, ისლამური რევოლუციის გუშაგთა კორპუსის მეთაური, გენერალ-ლეიტენანტი სალამი და საჰაერო თავდაცვის ჯარების შტაბის ხელმძღვანელი, გენერალ-ლეიტენანტი რაშიდი.
ირანის უზენაესი ლიდერი აიათოლა ალი ხამენეი და შეიარაღებული ძალების სარდლობა ისრაელს მკაცრი პასუხით და შურისძიებით დაემუქრნენ.
ირანის სახელმწიფო მედიის ცნობით, პარასკევ საღამოს ირანმა ისრაელზე საპასუხო დარტყმები განახორციელა და „ასობით სხვადასხვა ბალისტიკური რაკეტა“ გაისროლა. თეირანი აცხადებს, რომ ეს ისრაელის მიერ მანამდე ირანზე განხორციელებულ დარტყმებზე „გამანადგურებელი პასუხის“ დასაწყისია.
ავიადარტყმების ქვეშ მოხვდა 13-14 ივნისის ღამეს თელ-ავივი, სადაც დაშავდა სულ ცოტა 35 ადამიანი. 14 ივნისს, დილით გავრცელებული ინფორმაციის თანახმად, ირანის მიერ განხორციელებულ ავიაშეტევას სამი ადამიანი ემსხვერპლა.
ირანის სახელმწიფო მედიის ცნობითვე, ისრაელის მიერ თეირანში, საცხოვრებელ კორპუსზე განხორციელებული დარტყმის შედეგად 60 ადამიანი დაიღუპა, მათ შორის, 20 ბავშვი.