Израильде әуе кеңістігі жабылғалы 40 мың турист елден шыға алмай қалды

Израиль мен Иран арасындағы шиеленістің күшеюіне байланысты ондаған мың шетелдік турист Израильде қалып қойды, деп жазды Анадолы.

Израиль әуе кеңістігі жабылғаннан кейін адамдар Оңтүстік Кипрге яхтамен кете бастады.

Израильдің Haaretz газетінің хабарлауынша, әуе кеңістігі жабылған соң, елден кеткісі келгендер яхта арқылы Оңтүстік Кипрге өте бастаған. Эскалациядан қашқандардың қатарында шетелдік туристермен бірге кейбір израильдіктер де бар.

Тель-Авив маңындағы Герцлия теңіз портында көптеген адам теңіз арқылы эвакуация туралы келіссөздер жүргізген: бірі – еліне оралғысы келсе, енді бірі – шетелде жүрген балаларын іздеп баруға тырысып жатыр.

Қазіргі таңда шамамен 40 мың шетелдік турист Израильден кете алмай отыр. Кейбірі Кипрге теңіз жолымен жетіп үлгерді, бірақ мұндай сапарлар шектеулі және өте қымбат.

Кішігірім яхталардың иелері Герцлия, Хайфа және Ашкелон секілді жағалаудағы қалаларда бір рейсте 10 адамнан артық алып өте алмайды.

Әлеуметтік желілердегі арнайы топтар арқылы ұйымдастырылып жатқан эвакуацияға сұраныс өте жоғары. Билет бағасы бірнеше жүзден бірнеше мың еуроға дейін жеткен.

Бұған дейін Haaretz газеті Израиль үкіметі отанға оралатын азаматтар үшін жіберілген ұшақтарды елден кеткісі келетіндерге пайдалануға тыйым салғанын жазған.

Басылымның мәліметінше, 13 маусым күні Израильдің Иранға жасаған шабуылынан кейін басталған эскалация нәтижесінде 100–200 мың израильдік те шетелде қалып, елге қайта алмай отыр.

Еске сала кетейік, бұған дейін АҚШ елшілігі өз азаматтарын Израильден эвакуациялай алмай отырғанын жазған болатынбыз.

Қытай Израильдегі азаматтарын елден кетуге шақырды.

Литва азаматтарын Израильден эвакуациялау басталды.

Сообщение Израильде әуе кеңістігі жабылғалы 40 мың турист елден шыға алмай қалды появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.