16 миллион қазақстандықтың жеке дерегі ашық тарап кеткен: министр пікір білдірді
Цифрлық даму, инновациялар және аэроғарыш өнеркәсібі министрі Жаслан Мәдиев 16 миллион қазақстандықтың жеке дерегі тарап кеткені туралы ақпаратқа пікір білдірді, - деп хабарлайды Tengrinews.kz тілшісі.
Мәжіліс дәлізінде журналистер ведомство басшысынан мұндай ауқымды ақпарат қалай тарап кеткенін сұрады. Министрдің айтуынша, бұрыннан интернетте жүрген, ескірген деректер тараған.
"Бұл жаңа деректер емес, мемлекеттік деректер базасы бұзылған жоқ. Бұл бұрын тарап кеткен ескі деректер болуы мүмкін, олар даркнетте қолжетімді. Telegram арналарда пайда болған кезде оны бұғаттаймыз. Бұл деректер 2024 жылғы 1 мамырға дейінгі уақытты қамтиды", - деді ол.
Жаслан Мәдиевтің сөзінше, қазақстандықтар туралы ақпарат ауық-ауық ашық тарап кетеді.
"Даркнетте Т.А.Ә., ЖСН, телефон нөмірлері бар. Бірақ бұл деректер көпшілікке қолжетімді болған кезде Telegram арналарды бұғаттау бойынша шаралар қабылдаймыз", - деп қорытындылады ол.
Қандай жағдай болды?
16 маусымда 16 миллионнан аса жазба ашық тарап кеткені туралы ақпарат шықты. Бұл ақпаратты Кибершабуылды талдау және тергеу орталығының президенті Олжас Сәтиев растады.
Тұрғындардың мынадай жеке мәліметтері тарап кеткен: тегі, аты, әкесінің аты, жынысы, туған күні, ЖСН, мекен-жайы, тұрғылықты жері, телефон нөмірлері (ұялы, үй, жұмыс телефондары), азаматтығы, ұлты және тағы басқалары.
Кейін Цифрлық даму, инновациялар және аэроғарыш өнеркәсібі министрлігі қазақстандықтардың жеке деректерінің тарап кетуі туралы ақпарат зерттеліп жатқанын айтып, мәлімдеме жасады.
"Қазіргі уақытта барлық салалық ведомство мен қызметтер жұмылдырылды. Ұсынылған деректердің өзектілігіне де жан-жақты тексеру жүргізіліп жатыр. Алғашқы талдау көрсеткендей, мәліметтердің көпшілігі ескірген", – деп хабарлады Цифрландыру министрлігі.
Сілтемесіз жаңалық оқисыз ба? Онда Telegram желісінде парақшамызға тіркеліңіз!