Трамп: “Эрон ядро қуролига эга бўлмаслиги шарт!”
“Мен АҚШнинг навбатдаги урушга аралашишини хоҳламайман. Мен фақат бир нарсани талаб қиламан: Эрон ядро қуролига эга бўлмаслиги шарт. Буни мен охирги 20 йил давомида айтиб келяпман”, — деди Трамп қаттиқ ифода билан.
Унинг фикрига кўра, агар Эрон ядро қуролини қўлга киритса, у нафақат АҚШ, балки бутун инсоният учун катта хавф туғдиради. “Эронда ядро қуроли пайдо бўлса, у биринчи навбатда Америкаликлар ва бошқа инсонларга қарши ишлатилиши мумкин. Бу бутун дунёда ҳалокатга сабаб бўлади. Бу шунчаки сиёсий масала эмас, балки инсоният хавфсизлиги масаласидир”, — деб таъкидлади Трамп.
Шу билан бирга, президент Исроилга қаратилган АҚШнинг ёрдамига ҳам тўхталиб ўтди. Унинг таъкидлашича, АҚШ Исроилга турли йўналишларда ёрдам кўрсатмоқда. Аммо бу ёрдам барча америкаликлар томонидан қўллаб-қувватланаётгани йўқ.
“Албатта, бизда сайловчилар бор, уларнинг фикри турлича. Баъзилар Исроилга кўрсатилаётган ёрдамдан норози. Аммо мамнун бўлаётганлар ҳам йўқ эмас. Мен эса, фақат ядро қуролини Эрон қўлига топширмаслик тарафдориман”, — деди у.
Мазкур баёнот Исроилнинг 13 июн куни кечаси Эроннинг ядро инфратузилмасига қарши “Исёнкор шер” номли махсус операциясини бошлагани ортидан янгради. Исроил ҳарбийлари Эрон ҳудудидаги бир нечта стратегик объектларга зарба берганини маълум қилди. Эрон эса жавоб зарбаси билан қарши ҳаракатга ўтди.
Икки томон ҳам тўқнашув натижасида ҳалок бўлганлар ва жароҳатланганлар ҳақида расмий маълумотларни эълон қилди. Шу билан бирга, ҳар икки давлат ҳам етказилган зарар катта эмаслигини таъкидламоқда.
Бу орада халқаро ҳамжамият ҳам вазиятни жиддий кузатмоқда. Эрон ва Исроил ўртасидаги можаро нафақат минтақавий барқарорлик, балки глобал хавфсизлик учун ҳам жиддий таҳдид сифатида баҳоланмоқда.
АҚШ етакчисининг бу каби кескин баёноти Эронга жиддий огоҳлантирув бўлиб хизмат қилиши мумкин. Шу билан бирга, у Яқин Шарқда узоқ давом этадиган янги ҳарбий тўқнашувнинг олдини олиш учун дипломатик йўлларнинг муҳимлигини ҳам эслатиб ўтди.