Ўзбекистон курашчилари Осиё чемпионатида кумуш ва олтин медаллар билан старт олди

Ветнамнинг денгиз бўйи шаҳри Вунгтауда спорт курашлари бўйича U17 ва U23 ёш тоифаларидаги Осиё чемпионатига старт берилди. Қитъа миқёсидаги ушбу нуфузли мусобақанинг илк куниёқ ўзбекистонлик курашчилар совринли ўринлардан жой олишди ва мухлисларга фахр ва қувонч улашди.

Турнирнинг U23 йўналишида “классик” курашчилар майдонга тушди. Биринчи кун якунига кўра, Ўзбекистон терма жамоаси ўз зафарли юришини иккита олтин, битта кумуш ва бир бронза медали билан бошлади.

Қувонарлиси, терма жамоамиз сафида Абдулла Алиев (72 кг) ва Самандар Бобоназаров (82 кг) ўз вазн тоифаларида барча рақибларини мағлуб этиб, Осиё чемпионатининг энг юқори — олтин медалини қўлга киритишди.

Меҳрож Баҳромов (60 кг) эса, финалгача муваффақиятли етиб борди ва кумуш медал билан тақдирланди. Жамоадоши Оғабек Муқимов (67 кг) эса шиддатли беллашувларда бронза медалини қўлга киритишга муваффақ бўлди.

Ушбу мусобақадаги илк натижалар Ўзбекистонда кураш мактаби ва ёшлар тайёргарлиги жуда юқори даражада эканини яна бир бор намоён қилди. Қитъа чемпионатининг қолган кунларида ҳам юртдошларимизнинг зафарли иштирокини кутамиз ва уларга омад тилаймиз.

Мусобақа давомида яна қандай натижалар қайд этилиши ва қайси ёш курашчилар янги юлдузга айланишини Zamin.uz орқали кузатиб боринг!