Россияда илк букланадиган смартфон сотувга чиқиши арафасида
"Ведомости" нашри ёзишича, компания Хитойнинг “Пассион” корпорацияси билан ҳамкорликда биринчи марта кенг омма учун мўлжалланган букланадиган смартфон ишлаб чиқаришни режалаштирмоқда. Бу янгилик нафақат Россия бозори, балки бутун минтақа учун технологик бурилиш бўлиши мумкин.
"Ред Софт" ижрочи директори Михаил Толпишкин таъкидлаганидек, бу ҳамкорлик асосида яратиладиган асосий қурилма — MediaTek процессори билан жиҳозланган, экран қисмларидан эгилиб очиладиган замонавий смартфон бўлади. Компания аввал корпоратив мижозлар билан ишлаган бўлса, энди ушбу флагман қурилма орқали оддий истеъмолчилар учун ҳам очиқ савдога чиқаришни мўлжалламоқда.
Янги смартфоннинг тўлиқ техник хусусиятлари ҳали ошкор этилмади, аммо у юқори сифатли дисплей, кучли камера ва фойдаланувчи учун қулай интерфейс билан жиҳозланиши кутиляпти. Унинг асосий афзаллиги — букланадиган (foldable) экрани бўлиб, бу турдаги смартфонлар айни пайтда жаҳон бозорида трендга айланган.
Шунингдек, ҳамкорлик доирасида смартфондан ташқари планшетлар, ноутбуклар ва виртуал реаллик кўзойнаклари каби маҳсулотларни ҳам ишлаб чиқариш режалаштирилган.
Қурилмаларнинг расмий чакана савдоси 2025 йил ёзида старт олиши кутилаётган бўлиб, нархлар бўйича маълумотлар кейинроқ эълон қилинади. Шунингдек, "Ред Софт" компанияси Москвадаги Афимолл савдо марказида ўзининг биринчи дўконини очишни ҳам мўлжал қилган.
Бу қадам Россиянинг технологик мустақиллиги йўлида муҳим босқич бўлиб, ички бозордаги рақобатни янада жонлантириши кутилмоқда. Маҳаллий ишлаб чиқаришни йўлга қўйиш режаси эса қўшимча иш ўринлари яратилиши ва технологик салоҳиятнинг ўсишига хизмат қилади.
Мухлислар ва янги технологияларга қизиқувчилар учун бу — кутилган ва қизиқарли янгилик. Энди Россияда ҳам замонавий, замон талабига жавоб берадиган букланадиган смартфонларга эга бўлиш имконияти пайдо бўлмоқда.