«Բերման են ենթարկում, ձերբակալում, բաժին հրավիրում քաղաքացիներին»․ ահազանգեր՝ ՀՅԴ-ից, «Սրբազան պայքար»-ից, «Հինգ իրավապաշտպանների նախաձեռնություն»-ից. Factor.am
«Սրբազան Պայքար» շարժման տելեգրամյան ալիքով այսօր հայտարարություն է տարածվել, որ իրավապահ մարմիիններ ձերբակալում են պայքարի կողմնակիցներին։ Այս մասին հայտնում է Factor.am-ը:
«Հարգելիներ, հայտնում ենք, որ իրավապահ մարմիններն այս պահին իրականացնում են Սրբազան Պայքարի կողմնակիցների լայնամասշտաբ ապօրինի ձերբակալություններ: Քաղաքական հետապնդումների այս ալիքի պատճառը անհասկանալի է: Փաստենք, որ այն մեկնարկել է Փաշինյանի՝ Թուրքիայում գտնվելու պահին»,- ասված է հաղորդագրության մեջ։
ՀՅԴ Հայաստանի Գերագույն Մարմնի ներկայացուցիչ, ԱԺ պատգամավոր Իշխան Սաղաթելյանն էլ Facebook-ի իր էջում է ահազանգել իրենց կողմնակիցների նկատմամբ իրավապահների գործողությունների մասին։
«Քիչ առաջ ապօրինի ձերբակալություններ և խուզարկություններ են իրականացվել ՀՅԴ մարզային կառույցների պատասխանատու ընկերների նկատմամբ։ ՀՅԴ անդամների նկատմամբ քաղաքական հետապնդումների այս նոր փուլը մեկնարկել է Փաշինյանի՝ Թուրքիա կատարած այցին զուգահեռ։ Անկախ զարգացումներից և բռնաճնշումների ծավալներից փաստում ենք. որևէ բռնաճնշում չի կարող մեզ լռեցնել, այսպիսի գործելաոճն, ի վերջո, ծնելու է համարժեք հակազդեցություն»,- գրել է Սաղաթելյանը։
Վերջինս Factor TV-ի հետ զրույցում ասաց, որ իրենց կողմնակիցների մի մասը բերման է ենթարկվում, մյուս մասի հետ կապվում են քննիչներ ու հրավիրում քննչական կոմիտե։
«Հինգ իրավապաշտպանների նախաձեռնությունը» ևս հանդես է եկել հայտարարությամբ։ «Կեսօրից հետո Երևանում ու մի քանի մարզերում սկսել է «իրավապահների» տեռոր, որը հիշեցնում է 1915թ. ապրիլի 24-ի նախօրեն։
Ձերբակալվել, բերման են ենթարկվել, բաժին են «հրավիրվել» ընդդիմադիր հայացքներ ունեցող ու ամենատարբեր քաղաքական ուժեր ու խմբեր ներկայացնող մի քանի տասնյակ քաղաքացիներ»,- հայտարարել է նախաձեռնությունը։ Փորձել ենք նաև Ոստիկանությունից ու Քննչական կոմիտեից պարզել, թե ինչ գործողություններ են կատարում իրավապահները, ոստիկանությունից դեռ պատասխան չենք ստացել, իսկ ՔԿ-ից հայտնեցին որ իրենց կառույցն այս գործողությունների հետ առնչություն չունի։
The post «Բերման են ենթարկում, ձերբակալում, բաժին հրավիրում քաղաքացիներին»․ ահազանգեր՝ ՀՅԴ-ից, «Սրբազան պայքար»-ից, «Հինգ իրավապաշտպանների նախաձեռնություն»-ից. Factor.am first appeared on MediaLab Newsroom-Laboratory.