Эрон нефтини тезкор экспорт қилишга шошилмоқда

Яқин Шарқдаги кескин вазият ортидан Эрон нафақат мудофаа, балки иқтисодий стратегияларини ҳам жадал тарзда фаоллаштирмоқда. Bloomberg агентлиги терговига кўра, Эрон нефтини имконият борича қисқа фурсатда экспорт қилиб, эҳтимолий хавфларни олдиндан юмшатишга ҳаракат қилмоқда.

Агентлик маълумотларига қараганда, ҳозирда мамлакат портларидан нефть катта ҳажмда танкерларга юкланиб, тез-тез хорижга йўл олмоқда. Кўпчилик таҳлилчилар бу ҳаракатларни Эроннинг эҳтимолий Исроил зарбасига тайёргарлик деб баҳоламоқда — агар Исроил экспорт инфратузилмасига зарба берса, кутилган зарарни қисман камайтириш нияти бор.

Шунингдек, мамлакатнинг энг муҳим экспорт нуқталаридан бири бўлган Чарх оролидаги терминалда хом нефть захиралари жиддий равишда тўлдирилмоқда. Буни TankerTrackers платформасининг ҳаммуассиси Самир Мадани ҳам спутник суратлари орқали тасдиқлаган. Унинг сўзларига кўра, охирги кунларда резервуарлар деярли тўлиқ бўлиб, бу — Эрон дунё бозорига кўпроқ нефть етказиб беришга шошаётганидан далолатдир.

Bloomberg ёзганича, Чарх оролидаги резервуарлар махсус плававчи қопқоқлар билан жиҳозланган бўлиб, уларнинг қопқоқ соялари захиралар даражасини баҳолаш имконини беради. 11 июнда олинган суратларда резервуарлар тўлиқ тўлдирилмаган кўринган бўлса, 18 июнга келиб — бир ҳафта ичида — улар тўлдирилган ҳолда акс этган.

Қизиғи шундаки, Planet Labs томонидан олинган суратлар маҳаллий вақт билан соат 14:40 да, қуёш остида бир хил шароитда туширилган. Демак, соялар йўқолиши захира тўлдирилгани билан боғлиқ, табиий ёруғлик эмас.

TankerTrackers маълумотига кўра, 13 июндан бошланган беш кун мобайнида Эрон кунлик ўртача 2,33 миллион баррель нефть экспорт қилган — бу 2024 йилдаги ўртача миқдордан 44% кўп.

Самир Мадани шундай дейди:
“Бу аниқки — Эрон бугунги шароитдан унумли фойдаланиб, имкони борича кўпроқ баррельни четга чиқаришга ҳаракат қилмоқда”.