Пеп Гвардиола: "Манчестер Сити" совринсиз қолмади, ҳақиқатни тан олинг!

Сўнгги мавсумда “Манчестер Сити”нинг чемпионликлардан бирига эришолмагани ҳақида гап-сўзлар кўпайди. Айрим журналистлар ва футбол мухлислари “шаҳарликлар”нинг мавсумни ғалабасиз якунлагани ҳақида фикр билдирмоқда. Бироқ жамоа бош мураббийи Пеп Гвардиола бу каби баёнотларга мутлақо қўшилмайди ва ўз жамоасининг ютуқларини муносиб баҳолашни сўрайди.

Sky Sports мухбири Каве Солеколнинг “Манчестер Сити” ўтган мавсумда чемпионликка эришмади, деган сўзига Гвардиола жавоб қайтарди:
— Дўстим, бу нотўғри фикр! Бу ёлғон, буни сизга айтишга мажбурман. Балки шундай бўлишини хоҳларсиз, аммо бу ҳақиқат эмас. Биз Англия Суперкубогини ютиб олдик! Албатта, бу сиз учун етарли бўлмаслиги мумкин, аммо бу соврин — муҳим ютуқ! Биз бироз фарқли, лекин асосий мақсадларимизнинг бирига эришдик!

2024 йил 10 август куни бўлиб ўтган Англия Суперкубоги учун беллашувда “Манчестер Сити” ва “Манчестер Юнайтед” жамоалари тўқнаш келган эди. Қаттиқ курашли ўйин асосий вақтда 1:1 ҳисобида якунланди, аммо пенальтилар сериясида “шаҳарликлар” 7:6 ҳисобида зафар қучишди ва Англия Суперкубогини кўтаришга муваффақ бўлди.

Пеп Гвардиола ўз шогирдларининг меҳнати ва кучли руҳини эътироф этган ҳолда, ҳар бир соврин катта меҳнат ва интилиш натижасида қўлга киритилишини таъкидлади. Унинг фикрича, “Манчестер Сити” бу мавсумда ҳам ўзини энг кучлилар қаторида кўрсатиб, мухлисларини хурсанд қилди.

Шу билан бирга, бош мураббий жамоа олдида янада катта мақсадлар қўйилганини, келгуси мавсумларда янги ютуқлар учун янада кучлироқ ҳаракат қилишларини билдириб ўтди.