«Татарстанда җәй» проектының дүртенче атнасы яшьләргә багышлана

Татарстан Рәисе Рөстәм Миңнеханов инициативасы белән эшләтеп җибәрелгән «Татарстанда җәй» проектының дүртенче атнасы 30дан артык чараны берләштерәчәк. Казан халкын һәм кунакларын «Алтын битлек» Россия театр премиясе йөреше көтә, Кремльдә ачык һавада оркестр чыгыш ясаячак, ә ял көннәре масштаблы яшьләр вакыйгалары белән тәмамланачак.

Шимбә көнне, 28 июньдә, бөтен Татарстан мәйданчыкларында яшьләр көненә багышланган чаралар узачак. Быел ул «Бел. Ярат. Горурлан. Арттыр» шигаре белән уза.

«Катнашучыларны күренекле замандашлары – журналистлар, спортчылар, сәясәтчеләр һәм бизнесменнар белән очрашулар көтә, алар тәҗрибә уртаклашачак. Балтач районында яшь гаиләләр парады, Түбән Камада ГТО фестивале, ә Сарман районында Россия Герое, махсус хәрби операциядә катнашучысы белән очрашу булачак», - дип белдерде Татарстан яшьләр эшләре министры Ринат Садыйков.

Үз чиратында, Чаллыда Яшьләр көнендә «Прибрежный» паркы мәйданында концерт оештырыла. Анда шәһәрнең иҗат коллективлары, «Созвездие-Йолдызлык» һәм «Студентлар язы» фестивальләрендә җиңүчеләр, «Таврида Арт» резидентлары чыгыш ясаячак. Galibri & Mavik дуэты хедлайнер булачак, ә бәйрәм чарасы салют белән тәмамланачак.

Татарстан башкаласында төп вакыйгалар ике мәйданчыкта – «Урам» экстрим-паркында һәм Горький паркында барачак. Атнаның иң зур вакыйгалары урыннарында «Татарстанда җәй» тематик зоналары эшләячәк.