Эрон-Исроил можароси ҳақида янги тафсилотлар
Гувоҳларнинг айтишича, Тел-Авив ва жанубдаги Беершеба шаҳри яқинида портлашлар эшитилган. Исроил армияси Эрон томонидан олти тўлқин ракеталар отилганини билдирди. Исроилнинг миллий тез ёрдам хизмати эса Беершебада уч киши ҳалок бўлганини тасдиқлади. Бу Трамп душанба куни кечқурун ўт очишни тўхтатиш бўйича келишув эълон қилганидан бери Исроилда қайд этилган биринчи ўлим ҳолатларидир.
Оқ уй мансабдори Трамп Исроил бош вазири Бинямин Нетаняху билан телефон орқали суҳбатда ўт очишни тўхтатиш бўйича келишувга эришганини айтди. Исроил эса Эрон томонидан бошқа ҳужумлар бўлмаса, бунга рози бўлган.
“Ҳаммаси керакли тарзда ишлайди, шубҳам йўқ, мен ҳар икки давлат – Исроил ва Эронга 12 кунлик урушни якунлашдаги матонат, жасорат ва ақл-заковатлари учун табрикларимни билдирмоқчиман”, деб ёзди Трамп ўзининг Truth Social платформасида.
Теҳрон расмийларидан бири Эрон сулҳга рози бўлганини тасдиқлади, бироқ мамлакат ташқи ишлар вазири Исроил ўз ҳужумларини тўхтатмас экан, жанговар ҳаракатлар тўхтатилмаслигини айтди.
Аббос Аракчий сешанба куни эрта тонгда агар Исроил Теҳрон вақти билан соат 4:00 га қадар “ноқонуний тажовуз”ни тўхтатса, Эрон жавоб ҳужумларини давом эттириш ниятида эмаслигини айтди.
“Ҳарбий операцияларимизни тўхтатиш бўйича якуний қарор кейинроқ қабул қилинади,” — деб ёзди Аракчий Х (собиқ Twitter) тармоғида.
Трампнинг айтишича, Исроил ва Эрон бошлаган миссияларини якунлаш учун бироз вақтга эга бўлади, шундан сўнг ўт очишни тўхтатиш босқичма-босқич кучга киради.
Эроннинг ярим расмий CNN агентлиги хабарига кўра, Теҳрон сулҳ кучга киришидан олдин охирги ракета тўлқинини отган.
Дам олиш кунлари АҚШ қўшилган ҳолда Исроил Эронга нисбатан, хусусан унинг ядровий объектларига ҳужумлар уюштирган эди. Исроил Теҳронни ядровий қурол ишлаб чиқаришга яқинлашишда айблади.
Эрон эса ҳеч қачон ядровий қурол дастурига эга бўлмаганини таъкидлайди. Олий раҳбар Али Хоманаий эса агар истаса, дунё етакчилари бунга тўсқинлик қила олмаслигини айтган.
Исроил эса Яқин Шарқдаги ягона ядровий қуролга эга деб ҳисобланади, бироқ бу борада ҳеч қандай инкор ёки тасдиқ бермайди. У халқаро Ядро қуролларини тарқатмаслик тўғрисидаги шартномага ҳам қўшилмаган.
Қатарнинг Бош вазири Шайх Муҳаммад бин Абдурраҳмон Ос-Сони Теҳрон расмийлари билан телефон орқали музокара олиб бориб, Эроннинг келишувга рози бўлишини таъминлади, деб хабар берди Reutersга музокаралар тафсилотидан хабардор манба.
АҚШ вице-президенти ЖД Ванcе, давлат котиби Марко Рубио ва АҚШнинг махсус элчиси Стив Виткофф Эрон билан бевосита ва билвосита алоқа қилганини Оқ уй расмийси маълум қилди.
Бундан бироз олдин, уч нафар исроиллик амалдор Исроил Эрон ҳудудидаги ҳарбий операцияларини тез орада якунлаш ниятида эканини билдирган ва бу хабарни АҚШга ҳам етказган эди.
Нетаняху ҳукумат вазирларига сешанба тонгида бўлиб ўтган йиғилишдан сўнг омма олдида чиқиш қилмасликни тайинлаган, деб хабар берди Исроилнинг Чаннел 12 телеканали.
Бозорлар ушбу янгиликка ижобий муносабат билдирди
C&P 500 индексининг фючерслари душанба куни кечқурун 0,4% га ошди, бу эса АҚШ фонд бозори сешанба куни ижобий очилишини англатади.
АҚШ нефт фючерслари эса сешанба куни Осиё савдо сессиясида Трамп томонидан ўт очишни тўхтатиш эълон қилинганидан сўнг, минтақадаги таъминотга оид хавотирлар камайганлиги сабабли, бир ҳафтадан бери энг паст даражага тушди.