Қазақстанда жаңа мейрам пайда болуы мүмкін
Қазақстанда жаңа ұлттық мейрам – Тұлпар күні пайда болуы мүмкін, - деп хабарлайды Tengrinews.kz тілшісі.
Бұл туралы Мəжіліс депутаттарының ресми сауалына премьер-министр Олжас Бектеновтің жауабында айтылған.
Бұған дейін Мәжіліс депутаттары тобы үкіметке жылқы шаруашылығын дамыту мәселелері бойынша сауал жолдаған болатын. Автор саладағы бірқатар мәселелерді көрсеткен, мысалы, сапасыз жылқы етінің импорты, жылқыға қатысты мамандықтар бойынша жүйелі білімнің болмауы, ипподромдарды жаңғырту қажеттілігі. Сонымен қатар, мәжілісмендер елде кемінде бес заманауи ат спорты кешенін салуды, жылқы шаруашылығы бойынша ғылыми институттардың қаржыландыруын жақсартуды, сондай-ақ Тұлпар күнін ұлттық мейрам ретінде бекітуді ұсынған.
Премьердің жауабына сәйкес, жылқы шаруашылығы Қазақстанның агроөнеркәсіптік кешенін (АӨК) дамыту жөніндегі мемлекеттік бағдарламаларға енгізілген. Соңғы бес жылда бұл саланы дамытуға бюджеттен 9,4 миллиард теңгеден астам қаражат бөлінген, оның ішінде биылға шамамен 900 миллион теңге қарастырылған.
"Жылқы шаруашылығы субъектілеріне техника мен жабдық сатып алуға 25 пайызға дейін инвестициялық субсидиялар, сондай-ақ жылқы мен жабдық сатып алуға жеңілдетілген несиелер мен лизинг ұсынылады", – делінген жауапта.
Сондай-ақ, премьер маусымның екінші жексенбісінде Қазақстанда мал шаруашылығы саласындағы барлық қызметкерді, оның ішінде жылқы шаруашылығы мамандарын да қамтитын кәсіби мейрам – Малшылар күні атап өтілетінін еске салды. Сонымен қатар, БҰҰ Бас ассамблеясының шешімімен 11 шілде ұйымға мүше елдерде Дүниежүзілік жылқы күні ретінде аталып өтеді.
"Осыған байланысты Тұлпар күнін арнайы ұлттық мереке ретінде енгізу мәселесі қосымша қаралады", – деп сендірді үкімет.
Тұлпар — түркі мифологиясындағы аңыздағы қанатты немесе аспан жылқысы, грек мифологиясындағы Пегасқа ұқсас. Бұл мифтік жаратылыс Қазақстан мен Башқұртстанның мемлекеттік елтаңбаларында айқын бейнеленген. Тұлпардың шығу тегі Орта Азия халықтарының аңшылық дәстүрлерімен байланысты. Уақыт өте келе бұл екі жануар адам қиялында бірігіп, Тұлпар деп аталатын қанатты жылқыға айналған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!