Առաջին անգամ հայկական ավիաընկերությունը սեփականության իրավունքով ձեռք է բերել Airbus A321 օդանավ. Պապոյան
ՀՀ էկոնոմիկայի նախարար Գևորգ Պապոյանը հունիսի 24-ին մասնակցել է «FlyOne Armenia» ավիաընկերության նոր Airbus A321 օդանավի ժամանման հանդիսավոր արարողությանը։
Ինչպես հայտնել են նախարարությունից, սա կարևորագույն իրադարձություն է Հայաստանի ավիացիոն ոլորտում, քանի որ առաջին անգամ հայկական ավիաընկերությունը սեփականության իրավունքով ձեռք է բերել Airbus A321 օդանավ՝ ամրապնդելով առաջատարի իր դիրքը Հայաստանի ավիացիոն շուկայում։ Այն կարևոր քայլ է նաև Հայաստանում քաղաքացիական ավիացիայի զարգացման համար, քանի որ կնպաստի շուկայում գների կայունացմանը, երկրի տրանսպորտային հաղորդակցության ամրապնդմանը, հնարավորություն կընձեռնի ապահովել ավելի բարձր մակարդակի ծառայություններ՝ նպաստելով զբոսաշրջային հոսքերի ավելացմանը:
«Այս նախաձեռնությունը շատ կարևոր նշանակություն ունի Երևանն օդային տրանսպորտային հաբի վերածելու, ինչպես նաև Հայաստանից այլ երկրներ և հակառակ ուղղությամբ զբոսաշրջիկների հոսքը ապահովելու տեսանկյունից։ Այս օդանավը հնարավորություն ունի ավելի երկար թռիչքներ իրականացնելու, ինչը թույլ կտա հասնել ոչ միայն եվրոպական հեռավոր քաղաքներ, այլ նաև, օրինակ՝ Չինաստան և Հնդկաստան։ Այսինքն՝ սա նոր ուղղություններ և հնարավորություններ բացահայտելու իրական հնարավորություն է»,- նշել է Գևորգ Պապոյանը։
Միջոցառման ընթացքում նախարար Պապոյանը՝ «SIL Capital» ընկերության հիմնադիր և խորհրդի նախագահ Էդուարդ Սուքիասյանի և «FlyOne Armenia»-ի գլխավոր տնօրեն Արամ Խաչատրյանի ուղեկցությամբ, շրջել է օդանավում, ծանոթացել դրա ժամանակակից տեխնիկական հնարավորություններին, ինչպես նաև ընկերության ձեռքբերումներին ու զարգացման առաջիկա պլաններին։
Նոր Airbus A321-ը համարվում է իր դասի առաջատարներից՝ աչքի ընկնելով վառելիքի բարձր արդյունավետությամբ, թռիչքային ճկունությամբ և ուղևորների հարմարավետության բարձր մակարդակով։ 220 ուղևորի համար նախատեսված ընդարձակ սրահն ապահովված է նորագույն տեխնոլոգիաներով, լուսավորության համակարգով և ժամանակակից նստատեղերով, որոնք ապահովում են առավել հարմարավետ և կայուն թռիչքային պայմաններ։
Միջոցառմանը ներկա են եղել նաև Քաղաքացիական ավիացիայի կոմիտեի նախագահ Միհրան Խաչատրյանը, «FlyOne Armenia»-ի ղեկավար կազմը, պետական և մասնավոր հատվածի ներկայացուցիչներ, ինչպես նաև այլ հյուրեր։
The post Առաջին անգամ հայկական ավիաընկերությունը սեփականության իրավունքով ձեռք է բերել Airbus A321 օդանավ. Պապոյան first appeared on MediaLab Newsroom-Laboratory.