Исроил генерали: “Эронга қарши уруш ҳали тугамади”

Яқин Шарқдаги зиддиятлар фонида Исроил армияси раҳбариятидан муҳим баёнот янгради. Исроил Қуролли Кучлари бош штаби раҳбари, генерал Эял Замир 12 кун давом этган кескин тўқнашувлардан сўнг ўз позициясини очиқ баён қилди. Унинг таъкидлашича, ҳарбий ҳаракатларнинг бир босқичи якунланган бўлса-да, Эронга қарши кураш бутунлай якунланмаган.

“Муҳим бобни якунлаяпмиз, аммо Эронга қарши уруш тугамади. Биз ҳозир ҳарбий ҳаракатларда қўлга киритилган натижаларга таянган ҳолда янги босқичга ўтмоқдамиз”, – деди генерал Замир Iran International'га берган изоҳида.

Унинг сўзларига кўра, 12 кун мобайнида Исроил армияси Эроннинг стратегик ядровий иншоотлари ва ракеталарга оид инфратузилмасини жиддий равишда зарарсизлантирган. Бундан ташқари, фронторти қўмондонлик ва ҳарбий бўлинмаларнинг юксак тайёргарлиги ушбу операция муваффақиятига туртки бўлганини таъкидлади.

Шу билан бирга, Замир келгуси жараёнлар янада талабчан ва хавфли бўлишини таъкидлаб, мамлакат ҳарбийлари эҳтиёткорлик ва огоҳликни йўқотмаслиги кераклигини урғулади.

“Биз энди Ғазо секторига диққат қаратиб, ундаги барча гаровга олинганларни озод этиш, ҲАМАСнинг назоратини бартараф этиш ва минтақада барқарорлик ўрнатишни мақсад қилмоқдамиз”, — деди у.

Ушбу баёнот АҚШ президенти Дональд Трамп 24 июнь куни Исроил ва Эрон ўртасидаги тўқнашувларни тўхтатишга эришилганини эълон қилганидан сўнг келди. Шу куннинг ўзида Эрон Миллий хавфсизлик кенгаши ҳам сулҳга эришилганини тасдиқлади ва Исроил устидан “стратегик ғалаба” қўлга киритилганини маълум қилди.

Аммо Замирнинг сўзлари шундан далолат бермоқдаки, бу фақат танаффус, урушнинг тугаши эмас. Таъбир жоиз бўлса, ҳарбий ҳаракатлар “иккинчи бўлим” арафасида.