Авыл хуҗалыгы һәм азык-төлек министры Аксубай районында эш сәфәрендә булды
Татарстан Премьер-министры урынбасары – ТР авыл хуҗалыгы һәм азык-төлек министры Марат Җәббаров Аксубай районында эш сәфәрендә булып китте. Бу хакта «Авыл таңнары» яза.
Районның авыл хуҗалыгы тармагы эше белән танышу «Волга-Селект» ҖЧҖеннән башланды. Район Башкарма комитеты җитәкчесе Алмаз Мингулов белән Марат Җәббаров Рус Камәте авылы янындагы автоматлаштырылган эремә җитештерү объектын карап чыкты. Әлеге объектның эш күләме 380 тонна тәшкил итә.
Татарстан авыл хуҗалыгы һәм азык-төлек министры шулай ук ашлык киптерү комплексының (1нче линия) эше белән дә танышты, аның ашлык чистарту җитештерүчәнлеге – сәгатенә 200 тонна, ашлык киптерү эшчәнлеге – сәгатенә 80 тонна. Авыл хуҗалыгы предприятиесе җитәкчеләре планнары белән уртаклаштылар – ел ахырына кадәр монда тагын ике склад бинасын файдалануга тапшырырга ниятлиләр.
Район территориясендә «Волга-Селект» ҖЧҖе башлыча бөртекле, кузаклы һәм майлы культуралар игү белән шөгыльләнә һәм ел саен мул уңыш ала. Быел да югары уңышка нигез салынган. Делегация көзге бодай һәм көзге рапс мәйданнарында булды. Ведомство җитәкчесе үсемлекчеләрнең эшен иң яхшы позициядән бәяләде.
Районның АПК эшчәнлеге белән танышу «Чистай» ХКның «Аксу-Агро» ҖЧҖ филиалында дәвам итте, ул элеккеге «Автомат» дуңгызчылык комплексы территориясендә урнашкан. Холдинг компаниясе башкарма директоры урынбасары Иван Шугаев объект буенча экскурсия үткәрде һәм әлеге авыл хуҗалыгы мәйданчыгын үстерүнең алдагы планнары белән уртаклашты.
Тарханка авылында урнашкан Валерий Сапеевның каз үрчетү фермасы сәфәрнең соңгы объекты булды. Узган ел хуҗалыкта 20 мең баштан артык кош үстерелгән. Фермага дәүләт грантлары белән хуплана. Киләчәктә чалу һәм кош итен эшкәртү цехлары эшен җайга салу планлаштырыла.
Бу мәйданчыкта Марат Җәббаров районның эшлекле активы, фермер хуҗалыклары башлыклары белән очрашты.